Sinlung Hills mipuite vote thlak ni

Thawhlehni hian Sinlung Hills Council huam chhunga mipuite’n Sinlung Hills Council hruaitu turte thlangin vote an thlak dawn a, inthlan buaipuitute an inpeih fel tih thu dawn a ni.
He inthlanah hian political party-te’n theihtawp an chhuah a, Aizawl atanga campaign pawh an thahnem. Amaherawhchu, zirlai exam a hnaih avangin Aizawla lehkha zir, vote thlak tura haw an thahnem lo ang tih hlauhna a awm.
Sinlung Hills Council-ah hian vote nei mipa 11875 leh hmeichhia 11914, an vaiin vote nei 23789 an awm a. Inthlan hmasa ber, kum 2019-a neiha vote nei 20914 nen khaikhinin, vote nei punna hi 2875 a ni.
He council-ah hian bial 12 a awm a, Tuivawl MLA bialah paruk, Chalfilh MLA bialah pali, Serlui MLA bialah pahnih a awm. A district zawngin Aizawl district ah bial 6, Kolasibah bial 2 leh Saitualah bial 4 a awm a ni.
He inthlanah hian Congress party-in party malin bial tin an chuh a, ZPM-in bial riat chuhin an thawhpui HPC te’n bial li an chang. MNF-in bial 10 an chuh a, an thawhpui HPC-R te’n bial hnih an chang. Independent ticket-a ding 14 an awm bawk. Candidate hi mi 49 an ni.
Sinlung Hills Council hi HPC-D leh Mizoram sorkar inremna hrin chhuah a ni a, March ni 8, 2018 khan an inrem a, 2019-ah inthlan hmasa ber a awm. Tun hi inthlan vawi hnihna a ni.
Inthlan hmasa berah MNF-in bial nga an chang a, an thawhpui HPC te’n bial nga bawk an chang. Independent candidate pahnih an tling.
Mahse sorkar hi a inthlak zeuh zeuh a, sorkar hmasa ber hi 2022-ah inthlakin, a party-te chu ngai mah se sorkar hotu berf CEM (chief executive member) an inthlak.
Thla thum hnuah sorkar a inthlak leh a. CEM hmasa ber kha CEM a ni leh. MNF leh HPC inremna a tawp zui bawk. Nikum December khan sorkar a inthlak leh a, MNF member pakhat, HPC member pakhat leh independent member pahnihte ZPM-ah lutin state-a sorkar thar ZPM-in Sinlung Hills Council-ah member an nei ve ta. HPC member pathumte nen sorkar an siamho ta a ni.
Inthlan a hnai telh telh a, inthlan boruak hi a lian telh telh tih thu dawn a ni. Party lian pathumte an tang a, Aizawl atangin campaigner engemaw zat an intir reng. Minister ni laite leh politics-a hming langsar tak takte’n an thutchilh deuh reng bawk.