Zirna lama thleng sang lem lo, theihna nei Banah Kai dawn – Lalduhoma

Zirnaa thleng sang lem lo, theihna leh thiamna dang nei tan sawrkarin Bana Kaih scheme-ah sawrkarin remchang a siamsak dawn tih chief minister Lalduhoma chuan a sawi.
Govt. Gandhi Memorial High School Champhai chuan Inrinni khan a kum 75 tling a, hemi puala Platinum Jubilee lung an phun chu he school-a lo zir tawh chief minister Lalduhoma hian a hawng. Zirnaa hlawhtling turin school luh tirh phat atangin mar tha takin, hahthlak lutuk si loa zir nghal tan exam dawna beih vak ngai loin tha takin a pass theih tih a sawi a. Chutihrualin zirnaah kan za in kan hlawhtling vek thei lo, tiin, chutianga harsatna an lo tawk a nih pawhin beidawng mai lo turin zirlaite a chah.
“Pathian min pek theihna hlu tak tak dang kan lo nei thei. Zirnaa thleng sang lem lo mi hlawhtling tak tak khawvelah an tam em em a, tih tur leh thawh tur dang hi a tam lutuk. Sawrkar flagship scheme – Handholding pawh hian chutiang mi, theihna leh thiamna kawng dang nei si te tan remchang a siamsak dawn a ni,” a ti.
GM High School chu tun dinhmun a thlen theihna tura chhertu, thil tam tak a zir chhuahna a ni a, engtiklai mahin a theihnghilh thei tawh lo tih Lalduhoma hian a sawi. “Chief minister-a lakluh ka nih ni khan pawl 10 ka classmate zawng zawng ka sawm a, a hnuah chief minister chenna inah inhmuhkhawm hlimawm tak kan nei leh bawk. Kan zirpuite hi a hnu zela kan thian tha ber berte an ni zui thin a, vawiina zir mekte pawhin thiantha tak tak siamna hmunah lo hmang rawh u,” tiin he school zirlaite a chah.
GM H/S Platinum Jubilee lawmna pui ber hi November 21 & 22 khian he school-a lo zir chhuak tawh tho Home minister K Sapdanga hoa hman a ni dawn a. He school-ah hian tunah zirlai 232, teaching staff 14 leh non teaching staff 1 an awm. Mizorama museum hmasa ber ni turin kum 1968 khan GM High School hian museum an lo nei tawh a ni.