Box office-ah ‘Moana 2’-in record a siam
Box office-ah ‘Moana 2’-in record a siam
US-ah Thanksgiving day an hmang a, chawlh a lo rei deuh bawk nen cinema hall ticket hralh a kal hle a, US-ah Thanksgiving weekend-ah cinema hal sum che vel tam ber tum a la ni. Hetiang boruak rawn thlentu chu animated movie ‘Moana 2’ bakah ‘Wicked’ leh ‘Gladiator II’ te an ni e.
‘Moana 2’ hian opening weekend-ah US-ah cinema hall ticket hralhna atangin dollar maktaduai 221 la lutin box office No.1 a ni a, record a rawn siam nual a, Thanksgiving opening a sum la lut tam ber bakah Thanksgiving holiday chhunga sum la lut tam ber leh Walt Disney Animation tana opening weekend-a sum la lut tam ber record te a siam.
Moana 2 hian tun weekend kalta ni thum chhung khan US-ah cinema hall ticket hralhna atangin dollar maktaduai 135.5 a la lut thei a, hei baka hian Thanksgiving chawlh nen ni nga chhungin US-ah dollar maktaduai 221 a la lut thei bawk.
Moana 2 hi US pawnah pawh a che tha viau a, dollar maktaduai 165.3 la lut theiin, tihian khawvel huapin dollar maktaduai 383.3 a la lut der tawh a ni.
Moana 2 hi a tirah chuan television series atana an duan a ni a, mahse, cinema hall lama chhuah turin an siam leh ta zawk a. Moana film hmasaah khan Lin-Manuel Miranda hlate an hmang a, a hlawhtling thawkhat hle a, tun tumah hian Abigail Barlow leh Emily Bear te hla hmangin, a film hmasa a aw thawhtu Auli’i Cravalho leh Dwaye Johnson an inkawp leh a ni. A film-ah hian Moana chuan an thlahtu bul lam atangin kohna a dawng tlat mai a, tuipui zau takah thil chi hrang hrang paltlang turin a thawk chhuak leh ta a ni. He film hian Johnson hian a role ngai demigod Maui tan a aw a thawh leh a ni.
‘Wicked’-in tun weekend kalta kan dollar maktaduai 112 la lut lehin, box office No.1 a ni a, Thanksgiving chawlh nen, ni nga chhungin dollar maktaduai 117.5 a la lut a, tihian kar hnih chhungin US-ah dollar maktaduai 262.4 la lut tawhin, US pawna a lak luh nen chuan dollar maktaduai 359.2 a tlin tawh bawk.
Gladiator II pawh a la kal tluang viau a, dollar maktaduai 44 la lut lehin, No.3 a ni a, tihian US-ah ni 10 chhungin dollar maktaduai 111.2 a la lut tling ta a, US pawna a lak luh nen chuan dollar maktaduai 320 a tlin tawh. Gladiator II hi Denzel Washington leh Paul Mescal te channa a ni.
Dwayne Johnson channa dang, Chris Evans nena an channa, ‘Red One’-in dollar maktaduai 18.7 la lut lehin No.4 a ni a, he film hian US-ah dollar maktaduai 76.1 la lut tawhin, US pawna a lak luh nen kar thum chhungin dollar maktaduai 148.7 a la lut tawh bawk.
The Best Christmas Pageant Ever chu top 5 khartu niin, dollar maktaduai 4.9 la lut lehin No.5 a ni a, kar li chhungin US-ah dollar maktaduai 32 a la lut tling ta.
Box office Top 10:
1 Moana 2 $135,500,000
2 Wicked $80,000,000
3 Gladiator II $30,700,000
4 Red One $12,896,000
5 The Best Christmas Pageant Ever $3,275,000
6 Bonhoeffer: Pastor. Spy. Assassin $2,403,859
7 Venom: The Last Dance $2,200,000
8 Heretic $956,797
9 The Wild Robot $670,000
10 A Real Pain $665,000