Inrimnaah innel hmaa sawi loh chi

Inrimnaah innel hmaa sawi loh chi
Tunlaiah a engamah hmaa intawngpawng rim ngawt te kan tih tawh lem lo, kan duh zawng leh min duh ve deuhtu ni a kan hriat te nen kan inrimna hmun te pawh a danglam tawh khawp mai. In inrim te chu innel deuh hnu boruak a ni ta deuh mah a, in lama kan inlenchilh tawh chinah chuan kan boruak pawh a lo kal ve deuh nual tawh tihna a ni tlangpui.
Kan nun phungah hian inlenpawh tak leh in a inrim thin kan nihna te hi chuti mai a bo thei lo va, pawn lamah inrim nel viau tawh pawh ni ila in lama inrim hian a chhunzawm a tul hun a awm leh tho thin.
Hetianga in lama inlenchilh emaw, pawn lama inrim emaw chang pawh hian kan innel viau hma hi chuan sawi tur leh titi tur thlan thiam a ngai khawp mai. Relationship lama mithiam ten inrimnaa sawi loh atana tha zawk ni a an sawi te kan rawn tarlang e.
Politics lamah i tui viau a ni thei a, ram i vei em em pawh a ni thei. Mahse, i nula rim kha a lo tui ve lo palh a nih chuan a pawi fû ang. Tin, ngaihdan in an loh leh party âwn lam a inan loh palh phei chuan inhnial thinrim te pawh thil awm thei a ni. Chutiang bawkin sakhuana leh rinna lam te pawh sawi lutuk loh a fuh zawk thei. Kan awmna kohhran a inan loh a, thurin te a lo inan loh phei chuan duh aia thui inhnial a awl riau a, sakhaw rinna leh thurin chungchanga inhnial phei chu rin aiin tan nat a awl teh mai a nia!
Mahni chanchin sawi pawh hi a awm tawk a awm a, chutiang ni lova mahni han infak chiam mai te hian midang beng tithlep duh riau a nia. Mipa tan han insawi luck chiam mai te pawh a fuh vak lo, ngaihzawng neih tawh zat tih vel te chu a insawitheihna chi loh khawp ang. A engamah hmaa insawithei lutuk hmuha min hmuh nghal mai chuan thlen thui a har dawn tlat.
Chhungkaw din lam sawi nghal ut loh tur. Nupui neih vat i duh tawh thu te, i chhung ten nei thuai thuai tura an nawr tawh che, tih vel kha innel tak tak hma chuan sawi loh a fuh ang. I fa neih duh zat te nen lam i sawi nghal hmiah hmiah mai a nih chuan a lo duh rilru ve deuh che a nih pawhin a hlauh phah zawk mai ang che tih a hlauhawm.
I ngaihzawng hlui leh in inthen chhan te sawi chi a ni lo. Ngaihzawng hlui te rel zuah zuah te pawh a tul lo khawp ang. Chubakah, ngaihzawng then vanga lunglen thu leh insawi khawngaihthlak vel pawh a tih chi loh.
I hrisel loh thu te pawh sawi loh a fuh zawk. I rim mek chu doctor pawh ni se i natna benvawn neih te sawi a tul lo. I hnung kham thin leh BP sang tih vel pawh sawi loh a fuh zawk ang.