Kar tawp football hnuhma langsar

Kum 2024 chhunga November ni hnuhnung ber Inrinni zan leh December thlaa ni hmasa ber Pathianni zan khan football a tualchhung league hrang hrang khelh chhunzawm a ni. League hrang hrangah inkhel hmuhnawm tak tak a awm a, football ah hnuhma thar eng emawzat hmuh belh tur a awm bawk. Kar tawp football hnuhma langsar kan hrut kual leh ang.
English Premier League
Champion lai Manchester City khelh chhiat a kal tluang a, Pathianni zana an khingpui Liverpool lakah 2-0 in an tlawm. City hi EPL an khelh hnuhnung vawi li-ah an tlawm zawn tawh a. Hei hi August 2008 hnu lamah EPL-ah vawi li an tlawm zawn lehna hmasa ber a ni. City vawi li a tlawm zawn pui hi Pep Guardiola-a’n league-ah a club enkawl vawi li a tlawm zawnpui hmasak ber tum a ni tel bawk.
Liverpool an chetha a, an player pawimawh Mohamed Salah a chetha viau bawk. Salah hian City an hneh tumin goal a thun bakah assist a nei. Salah hian EPL-ah goal thun leh assist kawp vawi 36 a nei tawh a, he lama record nei tha ber Wayne Rooney Record a nihrual. Salah hian EPL-a big six club a hmachhawn tawh vawi 74 a hmachhawn atangin goal ah vawi 64 zet a inrawlh tawh bawk.
Season kal mekah Tottenham player Brennan Johnson a chetha chho viau a, inelna hrang hrangah penalty atang ni lovin goal 10 a thun tling der tawh. A chungah hian goal 15 thun tawh Erling Haaland a awm.
Arsenal chuan kum 2024 chhungin Mimualah goal nga chin thunna game nga ngawt an nei tawh. Gunners hi English top-flight-ah kum khat chhunga Mimuala goal nga chin thun tam record Sunderland (1892) leh Manchester City (1937) te an nihrual.
Season kal mekah game 13 an khelh tawh atangin Arsenal forward Bukayo Saka chuan assist vawi 10 a nei tling der tawh. EPL-ah game hmasa 13 atanga assist ngah zual zingah a tel a, a chungah hian Cesc Fabregas (12), Mesut Ozil (12) leh Harry Kane (11) te an awm.
London club lian Arsenal hian corner atangin goal an thun thei riau a, season liam ta tan tirh atanga tun thlengin Corner atangin goal 20 zet an thun tawh a. Heng zinga goal nga hi defender Gabriel Magalhaes tauh luh a ni.
Inrinni zanah 4-2 a Wolves an hneh tumin AFC Bournemouth chuan penalty atangin goal thum a thun a. Kluivert hi EPL-ah penalty atanga hattrick siam hmasa ber a ni.
Manchester United captain Bruno Fernandes chuan February 2020-a EPL club a zawm atangin big chance vawi 100 ngawt a siamchhua tawh a. Hemi chhung hian ani aia big chance siam hnem awmchhun chu Big chance vawi 104 siamtu Kevin de Bruyne chiah a ni.
Spanish La Liga
Real Sociedad tan Mikel Oyarzabal chuan game 362 atangin goal 100 a thun tling ta chiah. Oyarzabal hi Real Sociedad tan inelna hrang hranga goal 100 thun tling thei pangana a ni.
Pathianni zanah Getafe an hneh tumin Jude Bellingham chuan penalty atangin hmahruaina goal a thun. Bellingham hian Real Madrid tan penalty vawi li a chhuih tawh a, a la chhuih goal vek.
Season kal mekah FC Barcelona chuan woodwork vawi 14 ngawt an tihper tawh a. Season kal mekah woodwork tih per tam fal niin an hnuaiah hian woodwork vawi 10 tihper tawh Bayer Leverkusen, Lille leh Cagliari te an awm.
Italian Serie A
Juventus chuan pathianni zana an khingpui Lecce chu 1-1 in an inhnehtawkpui. Juvents hian kum 2024 chhungin Serie A-a draw vawi 18 ngawt an nei tawh a. Kum khat chhungin Serie A-ah draw neih ngah ber record thar an siam.
German Bundesliga
Kum 21 leh ni 278-a upa Bayern Munich player pawimawh Jamal Musiala chuan Mimuala Bundesliga an khelh hnuhnung vawi rukah goal a thun vek a. Bundesliga-ah hetiang ti thei naupang ber dawttu niin a chung chiahah hian Kum 21 leh ni 10-a upa Werner Weist a awm.
Bayern Munich si nghak ropui Manuel Nuer chuan German top-flight-ah vawi 512 a khel tling ta chiah a. Si nghak zingah Bundesliga khel hnem pathumna niin, a chungah hian Oliver Kahn (557) leh Eike Immel (534) te an awm.
French Ligue 1
Lyon forward Alexandre Lacazette chuan Ligue 1-ah goal 150 a thun tling tawh a. Kum zabi 21 chhungin Ligue-a a goal thun hnem pathumna a ni a, a chungah hian goal 191 thun tling Kylian Mbappe leh goal 161 thun tling Wissam Ben Yedder te an awm.