Spotify-a zaitiam stream nasat ber Taylor Swift Hla stream nasat ber Sabrina Carpenter ‘Espresso’

Spotify-a zaitiam stream nasat ber Taylor Swift
Hla stream nasat ber Sabrina Carpenter ‘Espresso’
Spotify Wrapped an tichhuak a, kumina khawvela streaming service lian berte zinga mi Spotify-ah hian Taylor Swift leh Sabrina Carpenter te chu 2024-a a langsar ber pawl an nia, Swift hi 2024-a zaithiam stream nasat ber niin, a album ‘The Tortured Poets Department’ chu kumina Spotify-a album ngaithlatu ngah ber a ni bawk. Sabrina Carpenter hla ‘Espresso’ chu kumina Spotify-a hla stream nasat ber a ni ve thung.
Taylor Swift hla hrang hrang te chu khawvel huapin he streaming service-ah hian vawi tluklehdingawn 26.6 stream a kai thei a, Spotify-a 2024 a zaithiam stream nasat ber niin, The Weeknd, Bad Bunny, Drake leh Billie Eilish ten an dawt.
Swift hi nikum pawh khan kum khat chhunga Spotify-a zaithiam stream nasat ber a lo ni tawh a, a kum zawna hetiang dinhmuna ding thei hmasa ber niin, Spotify pawhin special Wrapped badge a profile-ah an dah tel sak a, a music bik atan animation an tih tel sak bawk.
Taylor Swift album ‘TTPD’ chu kumina Spotify-a album ngaithlatu ngah ber niin, Billie Eilish ‘Hit Me Hard and Soft’-in a dawt a, Sabrina Carpenter ‘Short n’ Sweet’ chu pathumna niin, Karol G ‘MANANA SERA BONITO’ leh Ariana Grande ‘Eternal Sunshine’ te top 5-ah an lang bawk. Taylor Swift ‘TTPD’ hi streaming service dang Apple Music pawhin 2024-a album stream nasat berah an lo puang tawh bawk a ni.
Sabrina Carpenter tan pawh chanchin lawmawm tak awmin, a hla ‘Espresso’ chu kumina Spotify-a hla stream nasat ber niin, vawi tluklehdingawn 1.6 stream a kai hman a, Benson Boone ‘Beautiful Things’, Billie Eilish ‘Birds of a Feather’, FloyyMenor leh Cris Mj ‘Gata Only’ leh Teddy Swims ‘Lose Control’ ten an dawt.
Spotify Wrapped hian nikum ang bawkin an streaming service hmang thin ten kum khat chhungin tu zai nge an ngaihthlak nasat tih leh eng hle nge an ngaihthlak nasat tih te an inhriat theihna tur leh an share theih tur data card an siam leh a, hei hi ‘Musical Evolution’ feature atanga access theih a ni.