Lallunghnema
Charity Lodge
Contract: 9862288182
-- Advertisement --
Zozam Times chanchinbuah kum 5 leh thla 9 chhung zet chu chawlhkar tin Consumer Huang regular takin ka nei thin a. Hemi hun chhung hian article 240 vel ka thawhin ka ring a. Harsatna eng emaw awm avangin Zozam Times-ah chuan consumer huang ka nei thei rih dawn lo a ni. Consumer Right mamawhna hi a sân êm avangin ka ziak lo thei lova, min nawrtu a chak êm a, ka hneh lo a ni ber.
Tuna kan thupui hi hetiang hi a ni a. Mumbai khawpuia District Consumer Disputes Redressal Commission chuan hmanni lawk khan, commerce platform pakhat Flipkart chuan an bungrua hman tlak loh (sub-standard) hmeichhe pakhat hnena an hralh avangin Rs. 10,000 lai an chawitir a.
Delhi State Consumer Disputes Redressal Commission pawhin a hun taka Uber Taxi-ina an thil phurh a thlen kimtir theih loh avangin Deficiency in Service-a puhin Uber India System Private Ltd. chu hrem turin thuremna(judgement) a tichhuak ta bawk a ni. Heng Flipkart leh Uber hremna hi remchang hmasa berah kimchang deuhva rawn ziah ka tum ang.
Ka WhatsApp message dawn thenkhat:
Benir— Door Step Service —
Gas hnianghnar leh rintlak.
Gas la turin chan buai a ngai lo.
Phone call bak a ngai lo.
I kawtkaiah ngei, mi tin tan.”
Heng thute hi tihhlawhtlin pakhat mah a awm lo. Inbumna mai mai a ni. Tunlai hian Parallel Marketeer (private gas company) Zoramah an awm a, a tam zawk chuan tuna kan sawi mekte hi tihsak intiamin tih hlawhtlin an nei lova. An bum a ni deuh ber mai. Henga harsatna tawk mek consumer-te hi an hming lak khawm mek a ni a. Centre For Consumer Education chuan a tul dan azirin hma a lakpui dawn a ni.
Bungrua chahtu tam takin tunah hian harsatna an tawk mek bawk a. Kohhran thenkhat leh mi thenkhat chuan generator an lei duh avangin Dealer pakhat hnenah a man an pe lawk vek a. Mahse he agent hian thla enga emaw zat hnuah pawh bungrua chu a deliver sak thei lova. An huai phah em em a ni. Kei akar, min pun a, ka buaipui ngial hnuah pawh tihfel pui a har em em a ni. Sumdawng dawt sawi pawisa miah lo, Customer-te bum leh tih der hreh hauh lo Mizo sumdawng hi kan tam sawt ta hle a ni. Zahna chang an hre der bawk si lo. Keini Activist tan hian a buaithlak ve em em a ni.
Hei hi ka sawi duh:
Bungrua engpawh i chahin a man pe lawk tawh suh.
Consumer Right hi kan sawi fo dawn! Mi tin damna leh engthawlna a ni si. Consumer Protection Act, 2019 sec. 2(9)-ah tarlan a ni a. Consumer-te hian consumer right 6 tha tak tak kan nei mek a ni. Chungte chu :
1) Mihring nunna leh bungrua him lo tak a consumer-te venhim hi a ni.
2) Bungrua chi hrang hrang man (price) a tawk baka sang tur laka consumer-te humhim.
3) Consumer-in thil a lei leh hman tur chu a hre chiang thei tur a ni.
4) Consumer chuan a thil lei leh hmanah a lungawina tawk a hmu tur a ni.
5) Consumer chu thil leitu a ni, a bungraw dinhmun a hre chiang tur a ni. Right a nei a ni.
6) Consumer chuan a dikna leh chanvo hriat theihna dan a nei tur a ni.
Sap tawngin hetiang hian tawi tein han tui hnih ila:
*Right to be protected
*Right to be informed
*Right to be redressed
*Right to be assured
*Right to be aware
*Right to be heard.
Consumer Protection Act, 2019 sec. 2(7)-ah hian chiang takin mi zawng zawng consumer kan nih theih thu tarlan a ni a.
1) Mi tu pawh thil leitu apiang consumer an ni.
2) Mi tu pawh service hmangtute chu consumer an ni.
Sumdawnna leh peipunna atanga thil leitu chu consumer an ni lo thung. Mahse, self-employment atanga thil leitute chuan dikna leh chanvo an bei a, consumer an ni thung.
Consumer Protection Act 2019 sec. 39 -ah hian Finding of District Commission tih a awm a. Hei hi consumer-te innghahna bul pakhat chu a ni. He Bung-ah huan hetiang hian consumer-te humhim an nih theih nan ziak a ni a.
*Bungrua tha lo lai paih(laboratory-a test a nih chuan)
*Bungrua tha lo thlaksak
*Compensation Consumer pek
*Thianghlim leh felfai taka bungrua siam that.
*Misleading advertisement ti tawh lo tura hriat tir.
*Bungrua him dam lo leh hlauhawm zuar lo tura hriat tir.
*Bungraw man him tawk (adequate cost) pek
*Service tha lo paih tir.
District Commission hi social court (vantlang court) a nih avangin civil court ang diak diaka kalpui loh tur a ni a. Commission vawn dan tur (regulation & rules) pawh a hrana siam a ni nghe nghe a. Mi rethei leh hnuaihnung ber berte pawhin an pan ngam tura commission te hi khalh ngil tur a ni. President leh member te chuan zahawm tak, nelawm takin consumer complaint chu an ngaihtuah tur a ni. A rang thei ang ber, belhchian dawl ni siin complaint thutlukna chu siam thin tur a ni. A rei berah thla 3 bak pelh loh tur a ni a. Chu aia rei a nih chuan Consumer Court a nihin awmzia a hloh tihna a ni. Laboratory a test ngai a nih chuan ni 150 chhunga tihfel tur a ni thung.
Aizawl District Consumer Commission hi office dang ang bawka fuke kim nei a ni a. Staff eng emaw zat an awm a, President leh member-te hlawh pawh hi a tha thaw khat ta hle a. Complaint a tam loh chuan sawrkar tan sum sen a hautak si a, complaint pakhat man hi a to (sang) thei hle a ni. Chuvangin mipui pawh kan inzirtir tam a ngai a. Mizoram State Commission bakah District dangte pawh hi pan thin ila, Commission hian awmzia a nei thei ang.
Consumer-te hian dikna, chanvo kan nei a, chungte chu ni tin kan hmang tangkai thei a ni. Sumdawng leh dawrkaite pawh hi consumer tho an ni. Naupangte lam hian consumer kan ni vek, thil leitu leh hmangtu kan nih miau avangin.
“Consumer Right hriat loh hi mawlna chi khat a ni a, changkan i duh chuan consumer right zir rawh”.
—Llh, Consumer Activist