Him dam takin Assad-a’n Russia a thleng

Him dam takin Assad-a’n Russia a thleng
Russia deputy foreign minister Sergei Ryabkov chuan NBC news in an kawmnaah Syria president atanga paihthlak tak Bashar al-Assad chuan him dam takin Moscow a thlen thu a sawi.
Thawhtanni khan Russia president Vladimir Putin chuan Assad-a hnenah an ram chuan humhimna tluan tling pek a tum thu a lo sawi tawh a, Syria ram chhunga thil thlenga chu chhiatna lian tak a nih thu a sawi bawk.
Syria hian kum 13 chhung zet tualchhung buaina an nei tawh a, khawthlang ram tam takin a thuneihna tihchhiat tum an chungin Moscow chuan theihtawpin a lo tichak tawh thin a ni.
Ryabkov chuan, ‘He lai hmunah hian a him a, dinhmun tha tak changin, Russia chuan a tul ang zelin a tanpui ang,’ a ti a. Engkimah buaina chingfel tura an puih reng dawn thu a sawi bawk.