Thunder leh Bucks in semi-final an lut

Nilaini zing khan NBA Cup quarter-final khelh a ni a, inkhel hmuhnawm taka hnehna chang Oklahoma City Thunder leh Milwuakee Bucks ten semi-final an lut.
Western Conference quarter-final-ah Oklahoma City Thunder in Dallas Mavericks an hmachhawn a, inkhel hmuhnawm takah point 118-104 in hnehna an chang. Thunder hian Maverick lakah bul an tan tha viau a, quarter hmasa berah point 8 in chungnung zawkah an tang. Quarter hnihnaah Mavericks an khel tha ve thung a, point ngaa chungnungin an khingpuite nen an inkar an tizim a. Thunder hian point thuma hmahruai chungin chawlhlawk an hmang.
Chawlhlawk hnu lamah Thunder an khel tha chhunzawm a, quarter thumnaah point 14 zetin an chungnung. Quarter hnuhnung ber an hmachhawn dawn thlengin point 17 zetin Thunder hi an chungnung a, semi-final lut turin an dinhmun a tha tawh hle. Dinhmun chhe takah ding mah se Mavericks in inlehthalna lian thlentir ngei tumin thapui an thawh a, quarter linaah thumin an chungnung naa an khingpuite hi point 14 in an hneh zo ta a lo a ni.
Dallas Mavericks an hneh tum hian Oklahoma City Thunder tan Shai Gilgeous-Alexander chuan point 39 lai a thawkchhuak. Point 39 lai a thawhchhuah bakah hian ball swh let vawi riat lai a dawn bakah assist vawi nga a nei tling bawk. Thunder hian Golden State Warriors leh Houston Rockets te inkhela chak zawk zawk an hmachhawn zui leh ang.
Western Conference quarter-final-ah Thunder an chak laiin Eastern Conference lamah Milwuakee Bucks in hnehna an chang a, semi-final an lut ve bawk. Semi-final lut turin Bucks hian an khingpui Orlando Magic chu point 114-109 in an hneh.
Inkhel hmuhnawm takah Bucks in bul an tan tha lova, quarter hmasa berah point 8 in hnufual zawk an ni nghal. Quarter hmasa berah hnufual zawk ni mah se quarter hnihna leh quarter thumnaa chungnung zawk ni ve ve in, point 8 in hma an hruai let ve thung. Quarter hnuhnung berah Magic in hnehna chan let tum viau mah se point ngain an khingpuite an umphak zo ta lova, semi-final lut zo lovin an tla zui ta a ni.
Orlando Magic an hneh tum hian Bucks player pawimawh Giannis Antetokounmpo chuan point 37 a thawkchhuak. Bucks hian Atlanta Hawks leh New York Knicks te inkhela chak zawk zawk semi-final-ah an hmachhawn zui leh ang.