Damdawi dawrah CCTV

Tun hnai khan District Magistrate, Serchhip District chuan thupek a tichhuak a, ‘Serchhip District chhunga Schedule H leh Schedule X damdawi zawrhna dawr (pharmaceutical store) zawng zawngah CCTV vuah vek tur’ tiin. Thupek zawm lo hremna dan (Section 223 of Bharatiya Nyaya Sanhita, 2023) pawh tarlan nghal a ni.
Aizawl district-ah chuan kumin July thla tawp lam khan damdawi dawra CCTV vuah tura thupek hi tihchhuah a lo ni tawh a. Thla li a liam ta a, CCTV vuah avanga thil dik lo hmuhchhuah a nih tak dan mipui hriat tura puanzar hi a la awm lo a ni maithei. Damdawi dawra CCTV vuah hi eng tin nge monitor a nih zui dawn tih pawh hi mipui lam chuan chipchiarin kan hre viau lo niin a lang.
Damdawi dawra CCTV vuah dan tur bik erawh ruahman a ni a, damdawi hralh chhuak tur ten eng damdawi nge hralh chhuah a nih tih hriat theih ngei tura CCTV-in a thla a lak (capture) theih tura vuah tur niawm tak a ni.
A technical thil lam chu eng pawh ni se, hetianga CCTV vuah a tul chhan niawm ta ber chu, medical doctor/practioner-in damlo hnena damdawi a chawhna lehkha (prescription) tel lova damdawi hralh chhuah a nih thin vang, niin lang. Ruih sual nana damdawi hmang duh thalai an awm thin avangin, zalen taka damdawi hralh hian ruihhlo ngai a tipung thei a, chumi ven/dan nan chuan CCTV hi a tangkai dawn niawm tak a ni.
Schedule X damdawite hi “narcotic and psychotropic substances-based drugs” an ni a, a hming tarlan loh pawhin a tam zawk chu mipui pawhin chanchin thar atangin kan hre tlanglawn hlawm tawh awm e.
Schedule X hnuaiah hian damdawi chi 15 awmin, Schedule H hnuaiah hian damdawi chi 510 a awm thung. Chuti a nih chuan, phalna neia damdawi dawr tawh phawtah chuan heng damdawi zinga a eng emaw ber hi chu a tel ngei ngei dawn tih a hriat a, CCTV vuah ngai vek tihna a ni awm e.
CCTV vuah tur tih hi chu zawm a harsa viau lo maithei, mahse a nihna tur angin hman a ni hlawm em tih hi fet taka enzui (monitor) a nih leh si loh chuan, a tangkai tur angin a tangkai leh dawn chuang lo tihna a ni. Dan tha tak hi tha tluantling tur chuan a nihna tur anga kenkawh hi a tul a ni.