Lunglei bawrhsap-in home tlawh

Lunglei bawrhsap-in home tlawh
Lunglei district bawrhsap Navneet Mann chuan Serkawna Baptist Church of Mizoram (BCM) hmunpui, BCM hnuaia hnuchham enkawlna in – Baptist Church Orphanage (BCO) leh Baptist Child Resources Centre (BCRC) bakah ruihhlo ngai leh rahbi tleute enkawlna – MBKHP Chhawmdawlna In, kum tling lo dan bawhchhiate enkawlna – Observation Home leh Special Home chu Thawhtanni khan a tlawh a. An dinhmun enfiahin, Krismas thilpek a hlan.
Bawrhsap-in BCM hmunpui a tlawhnaah BCM general secretary Rev Dr R Lalbiakliana hoin thawktuten an lo dawngsawng a, BCM Archives-a Sap Upa leh Pu Buanga leh Zosapte sulhnu hrang hrang leh kohhran thil pawimawh an lo enpui. BCO, BCRC, Chhawmdawlna In, Observation Home leh Special Home a tlawhnaah hian thawktuten lo dawngsawngin, an dinhmun leh hmalakna an lo hrilhfiah bakah an harsatna leh mamawh an lo thlen. Hmasawnna atana thil pawimawh hrang hrang an sawiho.
BCO-ah hian nau hnuchham leh naupang enkawltu mumal nei lo enkawl 28 awmin, BCRC-ah fa atana lak theih tur naupang enkawl lai 1 a awm a. Chhawmdawlna Inah hian ruihhlo ngai leh rahbi tleu chhawmdawl ngai enkawl lai mipa 66 leh hmeichhia 17, an vaiin 83 an awm mek. Kum tling lo ni chunga dan bawhchhiat avanga JJ Act hnuaia an nun siamthatna tura enkawl lai Observation Home-ah mipa naupang 2 leh Special Home-ah mipa naupang 13 an awm.