Saitualah sawhthing lei duh 11 awm tawh

Saitualah sawhthing lei duh 11 awm tawh
Saitual district-a sawhthing tharchhuah lei duha inziaklut mi 11 an awm tawh a, hmarcha lei duh pakhat a awm tawh bawk.
District Agricultural Marketing Committee Saitual chu a vawi 3-na atan Thawhtanni khan an chairman, district bawrhsap Dr Lalngura Tlau kaihhruaiin an thukhawm a. Thlai thar hralh hun chungchangah inbuatsaihna vawrtawp a thleng tawh a, kumtharah chuan inhralh/ lei char char theih a nih tawh dawn avangin theihtawp chhuah turin society hruaitute a chah. Sawhthing rate tha taka hralhna a nih rualin, rilru puthmang siamthatna (moral reformation) a kengtel, tiin, dik taka thil a kal theihnan ruahman a ni tih a sawi.
Saitual district-a thlai lei duh tur (buyer) inziaklut tawhte an enho a. Heng zingah hian sawhthing lei duh 11 leh hmarcha lei duh 1 an awm. MAMB atanga Sensitization fund DAMC-in an hmuh tur leh hmanral tawh dan enho niin, thlai thar (identified crop) hralh record leh account vawn dan tur inhrilh a ni. District chhung khaw hrang hranga thlai thar (identified crop) rate sawi niin, January 2025-a rate beisei dan thlirho a ni. Secondary Collection Centre-a thlai thar (identified crop) lut thei tur beisei dan leh thlai lei duhte huam chin (operation area) thlirho a ni bawk.
Thutkhawmah hian a kaihhnawih sawrkar department aiawh leh society hruaitute an tel a ni.