Federer record khumtu Novak Djokovic

Australian Open 2025 khelh mekah Nilaini khan Novak Djokovic chuan hnehna a chang a, Grand Slam hmachhawn ngun ber niin Roger Federer record a khum. Grand Slam-a vawi 24 champion tawh Djokovic hian set khat hloh chungin Jaime Faria a hneh a, third round a inhlangkai.
Australian Open-ah vawi 10 champion tawh Djokovic hian nilaini khan second round-ah qualifier Jaime Faria a hmachhawn a, bul a tan tha hle. Set khatnaah a khingpui a break zawn hnuin game khat chiah a hloh a, awlsam takin set a la. Awlsam takin set khatna la bawk mah se mak tak maiin set hnihna a hloh teh tlat thung. Set hnihnaah hian an inhnehtawk viau a, break nei thei an awm loh vangin tie-break khelh a ngai. Tie-break-ah mak tak bawkin Faria a chungnung a, Tennis player ropui ber lakah set a la.
Set hnihna hloh bawk mah se Djokovic a buai zui lova, kawng dik a zawh leh thuai. A khingpui lakah hian awlsam zawka set hnih a la zawn hnuin; 6-1 6-7 (4-7) 6-3 6-2 in hnehna a chang a, third round a inhlangkai. Third round-ah Czech 26th seed Tomas Machac a hmachhawn zui leh ang.
Jaime Faria lakah a chak leh tak hnuin Djokovic hian Grand Slam record a siam a, Grand Slam hmachhawn tam ber niin Grand Slam-ah vawi 430 a inlan tling ta chiah. Serbian pa huaisen Djokovic hi Grand Slam-ah vawi 24 champion tawhin Margaret Court nen an champion tam lam a inzat mek a. Australian Open 2025-ah a champion thei a nih chuan mipa leh hmeichhe zingah Grand Slam-ah champion tam ber record thar a siam thei dawn bawk.
Alcaraz a chak awlsam
Nilainia inkhel dangah champion tura rinkai zinga mi leh quarter-final-ah Djokovic hmaa ding thei tur Carlos Alcaraz chuan Yoshihito Nishioka a hmachhawn a, awlsam takin hnehna a chang.
Grand Slam-ah vawi 4 champion tawh Alcaraz hian Nishioka lakah tha chungchuang takin bul a tan a, set khatnaah game zawng zawng a la vek. Set hnihnaah pawh a khel tha zui viau a, game khat chiah hloh chungin set a la nawn zui leh. Set thumnaah Nishioka a khel tha hret a, game li lai la bawk mah se a serve a hum zawh loh vangin set a hloh nawn leh ta tho a. Carlos Alcaraz chuan 6-0, 6-1, 6-4 a hnehna changin third round a lut zui ta a, third round-ah NunoBorges a hmachhawn zui leh ang.