Champion zia pu ve lo Arsenal

January 18, Inrinni zan khan English Premier League 2024-25 khelh chhunzawm a ni a, si hnih faia hmahruai tawh Arsenal chu an mualah an chak zo lo. Arsenal an chak zawh loh laiin hmahruaitu Liverpool erawh chuan hnehna an chang ve thung a, an hmahruaina an tizau leh zual.
TeuhSenal?
Hmahruaitu Liverpool um a, champion thei dinhmuna ding turin Arsenal in chak an mamawh a, Emirates Stadium-a an mikhual Aston Villa lakah chak tumin an inlan. An mikhual Villa lakah khel tha in, si hnih ngawtin hmahruai bawk mah se uiawm takin an chak zo lo leh a, an mualah an chak Teuhsenal leh tut. Hun pawimawhah an chak theih loh khut thin vangin Arsenal hian champion zia an pu tak tak phak lo ang hiala ngaih a ni.
Chak mamawh Arsenal tan hian Gabriel Martinelli chuan minute 35-naah Leandro Trossard siamsak atangin hmahruaina goal a thun a. Martinelli goal thun hmang hian si khat faia hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal pawh an thun leh thuai. Manchester United lakah a chet nawi em vanga sawisel hlawh tak Kai Havertz chuan miute 55-naah an goal hnihna a thun a, an hmahruaina a tizau. An mualah ngei si hnih faia hma an hruai vangin Gunners hian point thum an hmu ngei tura ngaihna lian tak a awm hman. Mah se, hun pawimawha chak zawh loh an chin an bansan tak tak thei lova, Villa nawr let tuar lovin goal an chhuah zawn ta tlat thung.
Villa tan hian Youri Tielemans chuan minute 60-naah fuh zeta tauh goal in an si phurh a sut then. Goal an thun vangin an phur a, ngam takin Arsenal an nawn zui zat bawk. Youri Tielemans goal thun atanga minute riat na lekah Ollie Watkins chuan nalh zetin a pet goal zui leh a, an si phurh a sut zo ta nge nge. Goal hnih ve ve an thun hnuin inkhel a hmuhnawm zui viau a, chak tuma Arsenal tan khawh a hmuhnawm thei hle. Arsenal tan hian Kai Havertz chuan hma an hruai nawn lehna goal a thun hman zet a, VAR rawn a nih hnuin he goal hi hnawl a ni ta thung. Hand ball vanga goal pawm loh a nih hnuin goal dang a luh belh tawh lova Arsenal chuan an mualah uiawm takin point hnih an hloh ta a ni. Havertz goal pawmsak a ni lo hi inhnial zui theih tak tur a ni a, Arsenal tan a uiawm leh zual hle ngei ang.
An mualah Arsenal an chak zawh loh lai hian hmahruaitu Liverpool chuan mikhual an nihna hmun; Gtech Community Stadium-ah si hnih faiin hnehna an chang ve thung a, an hmahruaina an tih zau belh.
Liverpool hian mualneitu Brentford lakah goal an thun thei lo reng a, Mimualah an chak zo lo teuh hle. He inkhelah hian hun rei tak chhung goal lut a awm theih loh hnuin bench atanga lut Darwin Núñez chuan inhnaihchilh takin goal a thun zawn. Nunez hian minute 90+1-ah hmahruaina goal a thun a, minute 90+3-ah an goal hnihna a thun zui leh bawk. Brentford lakah an chak vangin Reds hian khelh khata khel tlem zawk chungin point rukin hma an hruai fal ta chiah a ni.