Bayern barakhaihtu Feyenoord
Bayern barakhaihtu Feyenoord
Netherlands rama zinchhuak Bayern Munich chuan playoff khelh buai ngai loa Champions League knockout roud luh mai an tumna an puitlin zo ta rih lo a, mualneitu Feyenoord lakah Nilaini zan khan tlawmin, table-a a sang pariat chin direct-a last 16 lut tur zingah Bundesliga giants hi an a tel pha dawn em a chiang ta lo zual!
Nilaini zana an result avangin point 12 nen Bayern chuan table-ah 15-na luahin, point khatin top eight pawnah an tawlhchhuak a, karlah Nilaini zana an league phase game hnuhnungber turah Slovan Bratislava hmachhawn chungin direct-a round sang zawk an luh phak dawn leh dawn loh a chiang tawh ang.
An kawtkaia point thum hlu zet an hlawhchhuah avangin Feyenoord tan top eight luahna chance a sang zual sauh thung a, point 13 nen table-ah 11-na luahin, karleh khian pariatna luah mektu leh Bundesliga club tho ni bawk Leverkusen an su leh dawn a ni.
Stadion Feijenoord inkhel en tura fans 43,106 pungkhawm zingah stadium chhunga halmawi hal chiam an awm avangin chu mi khu chuan khelmual a bawh a, khaw hmuh a tihfiah loh phak avangin inkhel tan hnuah minute engemawti chhung chu inkhel tihtawp lailawk niin, an han tan leh chu hlauhawm zawk viauin lang mah se minute 21-na lekah goal an chhuah ta mai a, Dutch team goal hmahruai hi Santiago Gimenez-a thun niin, Bayern siphurh sutna zawng tan Harry Kane chuan hun remchang hmu bawk mah se Feyenoord keeper Justin Bijlow a paltlang zo lo.
Chawlhlawk hma hun pekbelh minute kuanaah Calvin Stengs-a hlawhchhuah penalty atangin Mexico international Gimenez bawk hian Manuel Neuer-a ven goal-ah home team goal hnihna a chhuihlut leh a, half time-ah mualneitu team-in sihnih faiin hma an hruai phawt.
Second half-ah Bijlow bawkin Jamal Musiala goal tur dansak lehin, German mikhual hoin an siphurh sut zo turin goal dang an thun belh zo ta lo a; chutih laiin hun pangngai tawp hma minute khat chauh awm tawhah substitute Ayase Ueda chuan chiang lehzuala Feyenoord chakna goal ni turin an goal thumna a thawh ve leh.
Bundesliga hmahruaitu Bayern Munich khan goal thun tumin tum 32 ngawt home team goal lam hawiin ball thawnlut mah se goal khat pawh an hlawhchhuak zo lo a, match sariha an vawithum tlawmna a ni.
League phase khelh khat chauh awm tawha Bayern lehpeltu Feyenoord hian karlehah Lille an hmachhawn leh ang a, direct-a top eight an thleng zo ta lo a nih pawhin play-off khel tur team 16 zinga inhamtan tal an tum dawn a ni.