Bangkok-a inhnek tur Mizo boxer pahnih
Bangkok-a inhnek tur Mizo boxer pahnih
Laldinsanga leh Vanlalawmpuia chu February ni 7, 2025 khian Thailand khawpui Bangkok-a Super Fighter Series-ah an inlan dawn a; he international professional boxing event hi Crown Boxing Promotions nen thawkdun chunga Grassroot Boxing Promotions huaihawt a ni.
He boxing inelna lianah hian khawvel hmun hrang hrang atangin top-tier boxer-te an inlan dawn tih organizer lamin an puangzar a, international talent fuankhawm turte hi USA, France, Belarus, Ukraine, Thailand leh India mite an ni dawn tih an tarlang tel.
Laldinsanga vs
Sarawut Jiamthong
WBC Youth World Title champion leh professional boxing-a star langsar chho mek ni bawk hian Thailand fighter Sarawut Jiamthong a hmachhawn dawn a, Mizo boxer tan global boxing icon ni tura a rahbi pawimawh a ni ang tiin Grassroot Boxing Promotions thuchhuah chuan a tarlang.
Vanlalawmpuia vs Supachat Sukonthamanee
Mizoram atanga international professional boxer chawrchhuak dang Vanlalawmpuia hi hruihrual chhunga skill nei tha leh hmasawn chak niin, mahni inven dui dui lam aia tumpuite nawr chu a nihna aggressive fighting style hi a dinchanna thuruk a ni thin.
Grassroot Boxing Promotions thuchhuah chuan Mizorama boxing coach ngaihhlut hlawh berte zinga mi Sete Academy dinntu Mizo boxing coach Sete Renthlei fakna tarchhuak telin, a hnuai atanga infiammi tamtakin thiamna an zirchhuah tawh thu leh he academy hi Mizorama boxing talent haichhuaka chherhriamtu leh fighter chherchhuaktu a nih thu an sawi a, an discipline leh technique chu khawvel huap dawhsana pholan a la nih ngei an beisei thu an tarlang tel.
Champion hringchhuaktu a nih miau avangin Sete Renthlei pawh chu Indian boxing-a thawhhlawk tak niin an sawi bawk.
Super Fighter Series pawhin khawvel ram hrang hranga boxer-te ngaihven hlawh mekin, boxing fans lam pawhin he Series kaltlanga hruihrual chhunga khawvel huap fighter thate style leh technique insu tek chhuai chhuai lai thlir hlan an nghahhlelh thu tarlan tel a ni.
Bangkok khawpuia Indian boxer-te tana dawhsan lian chhawpsaktu Grassroot Boxing Promotions dintu Mujtaba Kamal leh Indian professional boxing hmasawnna atana thawhhlawk dang Rani Kamal-te zarah Indian boxer-te’n international platform an chuan thei dawn.
Mizo bixer-te tana kawng sialsaktute thukhawchang
Kamal chuan tun dinhmuna a hmachhawp mek sawichhuakin, “Kan goal chu a bulthut atanga fighter tur chherchhuah leh world champion an nih thlenga kaihhruai zui a ni a; tuna chetchhuahna kawng (event) hrang hrang kan chhawpsakte hmang hian kan boxer-te’n an thanlen zelna tur leh khawvel huap inelna an hmachhawn theihna tura an mamawh inphochhuahna hun remchang an hmu thei dawn a ni,” a ti.
Crown Boxing Promotions dinchhuaktu Payam Honari pawhin boxer-te tana international platform buatsaih pawimawhna lo belhchhah ve bawkin, “India talent kawl hi a awihawm loh hial zawk a, keini chuan he lai bial atanga khawvela a tha ber ni thei tur super fighter chherchhuah hi kan tum ber a ni.
“He Super Fighter Series hi kan sawi mek talent tihpun leh phochhuah pah zelna kawnga kan kutkawih leh inpekna hlimthla chu a ni e.”