Denmark-ah dinosaur luak hmu chhuak

Khawvela dinosaur an awm laia an luak chu Denmark-ah hmuh a ni tih Thawhtanni khan Museum of East Zealand chuan a puang.
Dinosaur luak khawro tawh hi tual chhunga hetiang chi zawng thin pakhatin Copenhagen chhim lam, UNESCO-in hmun humhalh tur a tih zinga mi, Cliffs of Stevns-a a hmuh a ni.
A teihawinaah Peter Bennicke-a hian thil danglam tak a hmuh chu en chiangin tuipui lily mai niin a tirah chuan a ngai a, a sak hle bawk.
Museum-a endik turin a la a, kum maktaduai 66 vel liam tawh, Cretaceous era-a dinosaur luah a ni tih an finfiah ta a ni.
Mi thiamte chuan he luak khawro tawh hi tuipui lily chi hnihin a belhbawm a ni a, sanghaten an ei ang a, an paitawih theih loh avangin an luak chhuak leh a nih hmel niin an sawi.
“Hetiang thil hmuh chhuah hi hun kal tawha thil nungte inrintawn dan chhuina atana thil pawimawh tak a ni a, ramsaten eng ang nge an lo ei thin tih hriattheihna tur tangkaitak a ni thin a ni,” tiin museum chuan thuchhuah an siam.
Paleontologist Jesper Milan pawhin lawm hle a, ‘thil danglam lutuk hmuh chhuah’ a nih thu a sawi a, prehistoric huna ei leh in inkhaidiat dan chhui zuinaah nasa takin a pui dawn tih a sawi.