Mipui sum luanral lohnan nasa takin sawrkar inhrek – Lalthansanga

Mipui sum luanral lohnan nasa takin sawrkar inhrek
– Lalthansanga
Mipui sum a lo thlawna luangral tam lutuk tih ziaawmna atan nasa takin sawrkar a inhrek tih minister Lalthansanga chuan a sawi.
Thawhlehni khan ZPM hruaitu Lalthansanga hian Hachhek constituency huamchhunga khaw hrang hrang a tlawh a. Vantlang inkhawm buatsaihah thu sawiin, hun rei tak chhung politics tha lo lak takin min chiah a, chu hri tha lo tak atangte, hausa leh rethei inkar zau lutukte, hnam tenau zawk tana hamthatna tha a awm theihnan heng saltanna lak atangin zalenna dar vaw turin mipuiin an koah rorelna an pe tih a sawi.
ZPM chuan thu mai ni lo, a tak rama thil a thlen zel theihnan hna an thawk nia sawiin, “Mipui sum a lo thlawna luangral tam lutuk tih ziaawmnan nasa takin sawrkar a inhrek a, kan kuta rorelna a tlak chiah khan leiba thahnem takin min delh nghal a, a bikin electric bill-ah leiba kan lo ngah em em a, nasa takin tan kan la a, tunah chuan bill kan pek that avangin lawmman kan dawng hial tawh a ni,” a ti.
Mipui hnenah eiru lo turin an intiam a, an intiam ang ngeiin tun thlengin eiruknaa hmingchhia an la awm lo tih minister hian a sawi. Mitinin an chanvo an chan theihnan dik takin ro an rel a, an kalkawngah hian mi hliam palh an nei tih an hai loa, mahse, ramin a that phahna atan chuan kal zel an tum tih a sawi.
“Contract hna kan thawh pawhin kan hna a tha tur a ni kan ti a, thawk tha lo chu kan hrem zel dawn. ZPM hi a tak taka kuthnathawktute hmangaihtu a ni a, kuthnathawktuten an thawhrim rah an seng theihna turin hmuh theihin hma a la mek a ni,” a ti.