Zofate zin kawngah February ni 20

Hmun hrang hranga Zo hnahthlakte tan February ni 20 hian pawimawhna a nei a, hemi hi hian hmun hrang hrangah hun an hmang thin. Kumin pawh hian February ni 20-ah Zo hnahthlak pawl hrang hrangin hun an hmang ang.
Myanmar-a Zo hnahthlakte tan chuan February ni 20 hi Chin National Day a ni a, he ni hi an ngai pawimawh hle.
Myanmar-ah hian Zo hnahthlakte hi Chin tia koh an ni a, 1940 February ni 20 kha an dikna chanvo humhim tura an beih tan ni-ah chhiarin he ni hi Chin National Day an ti ta a ni.
1948 February ni 20-ah hian Chin mipuite hruaitu pawimawh hrang hrang an inhmukhawm a, an dikna chanvo (right) humhim a nih theih dan tur an ngaihtuah a, chumi ni chu an dikna chanvo humhalhna ni-ah an chhiar zui ta a ni. 1951-ah Mindat khawpuiah a vawi khat nan Chin National Day hi an hmang.
He ni hi an hmang ta zel a, sorkar hriatpuia hmang ni lo mah se an hmang urhsun telh telh. Sipai sorkar hnuaia an awm chungin mipuiin tangrualin an hmang a, sipai sorkar an inthlahdul deuh hnu 2010 vel atang khan sorkarin hriatpuiin an hmang ta a ni.
2021-ah sipaiin thuneihna an pawnglak leh a, sipai sorkar leh anmahni paih thlak tumtute indo bur bur mah se Zo hnahthlakte’n he ni hi a theih ang angin an hmang tho. Mizoramah pawh raltlante’n Chin National Day hi an hmang thin.
Hmun dang thenkhatah hemi ni hi Zomi Nam Ni tiin an hmang thin thung a, Myanmar-a Zo hnahthlak thenkhatte leh Manipur-a Zo hnahthlak thenkhatin Zomi Nam Ni an ti.
Mizoramah chuan February ni 20 hi State Day a ni a, Mizoramin state dinhmun a luah tan ni a ni. 1986 June ni 30-ah MNF leh India sorkar an inrem a, a kum leh February ni 20-ah Mizoram chu state dinhmunah dah a ni ta a ni.
Kuminah Mizoram hmun hrang hrangah Mizoram sorkar bultumin Mizoram State Day of Prayer hman tur a ni a, hemi atan hian minister kaihhruai committee din a nih bakah bawrhsap-te’n an huam chhunga kohhrante hnenah he ni hi hmang tura ngenna lehkha an thawn.