Vawiina Maharashtra khel leh tur Mizo hockey team

India rama women’s hockey bika team tha zual pariatte inelna kal mek National Women’s Hockey League 2025 ( Final Phase)-ah Mizoram chuan vawiin hian Maharashtra an tum leh dawn.
Final phase kal mekah hian Mizo team hi chetha teh mah se first phase-a an chechhe lutuk kha a pawi a, kumin hian chak chho mawlh mawlh bawk mah se 3rd & 4th place match pawh hi an khel phak lo mai ang tih hlauhna a lian hle a ni.
Hockey thiam zual state pariatte inelna final phase-ah pawh hian team tinin match sarih theuh an khel leh dawn a, first phase-a an point hmuh tawh nen an belhkhawm ang a, a sang ber leh a dawttuin final an khel dawn a, point hmu sang pathumna leh palinate’n pathumna an inchuh ang.
Jharkhand khawpui Ranchi-a final phase kal mekah Thawhtanni khan Mizoram chuan an match nganaah Madhya Pradesh chu 2-1-in an hneh leh hlauh a; Mizoram goal hmasa zawk hi Laltlangchhungi’n minute 42-na (3rd quarter)-a a khung niin, an goal hnihna hi minute 58-naa B. Larinpuii tihluh a ni thung.
Thawhlehniah Mizoram hi chechhuak lehin, an match ruknaah tournament kal laia khel tha zet, Haryana meuh pawh hneh thei Odhisa an tum a, penalty shoot-out hmanga chak zawk zawnnaah Mizoram hi sihnih faiin an vanduai ta a ni.
He game-ah hian Odhisa lamin 1st quarter minute linaah goal an thun nghal a; Mizoram hian nasa taka an nawrlet chungin goal an thun thei lawk lo a, minute 55-naah Mizoram jersey no.11 Laltlangchhungi’n an siphurh a sut thei hram a, hun pangnghaiah goal dang luh belh loin team pahnih hi 1-1-in an inhnehtawk a, penalty shoot-out kaltlangin team tha zawka ngaih Odhisa hi Mizo tleirawlte lakah an chak ve hram a ni!
Tarlan tawh angin, Mizo team hian vawiinah Maharashtra an hmachhawn leh ang a, hei hi tun final phase-a an match tawpna a ni tawh ang.