IMD-in hmar lam lum uchuak turin sawi lawk

IMD-in hmar lam lum uchuak turin sawi lawk
Nilaini kha Delhi chu kum 2025 chhunga a lum ber ni niin 40.5°C a kai a, India Meteorological Department (IMD) chuan India hmar lam chu khaw lum uchuak takin a tuam dawn tih an sawi lawk.
Nilainiah khan Ridge-a khaw chin tehnaah chuan 40°C hi a kai a, a nih dan thin pangngai aia 6.3°C zeta lum a ni a. Thawhlehni khan 37.1°C a lo ni tawh bawk.
Kum 2024 khan March thlaa Delhi a lum ber ni chu March 29 niin 37.8°C a ni a, a hma kum leh chiahah khan tun thlaa a lum ber ni chu March 15 niin 34.3°C a ni tih IMD chuan a tar lang.
IMD-in an chhinchhiahna atanga a lan dan chuan tun ang huna Delhi-in khaw lum tak an tawh hnuhnung ber chu kum 2022 kha a ni a, March 29 khan 39.1°C a kai a ni.
Nilainiah khan boruak hnawn lam pawh a danglam nasa hle a, 19% atangin 52%-a kai lai pawh a nei a. Nilenga a vawh lai ber pawh 17.7°C a ni.
Weather department chuan India hmarthlang lam chuan nikum aia a let dawna tam chuan nipui lum tak ni an tawng dawn niin an sawi lawk bawk.
Heng lai velah hian kum khatah khaw lum uchuak ni hi ni nga/ruk vel an tawng thin a, kuminah chuan ni 10 atanga 12 inkar vel an tawng thei dawn niin an sawi.
“A nih dan thin pangngai aia lum uchuak ni a tam deuh kan ring a, a bikin khawthlang leh ram lailiah a nih hmel a. A pum puia lakin India hmarthlang lam hian kum khatah lum uchuak ni hi ni nga/ruk nei thin an ni a, kuminah hi chuan ni 10 atanga 12 kan beisei deuh,” tiin IMD scientist Soma Sen Roy chuan nipui lo thleng tur an thlir lawknaah a sawi.
Hetih lai hian IMD thuneitu sang hian nikum aiin kuminah khua a lum dawn em tih chu a sawi thei lo va, kum 2024 kha chhinchhiah china India a lum ber kum a ni a. Nikum khan khaw lum tak ni hi ni 554 a awm a ni.