Fimkhur Thla

April thla hi, 2024 YMA rorel inkhawmin a lo rel tawh angin, furpui thlen hmaa inralrinna hun “Fimkhur Thla” atan Central YMA chuan tunhnai khan puangin a hawnna te pawh neih a ni a.
Central YMA-in ngenna a tihchhuah ang chuan, in hmun leh lei laiten furpui thlen hmaa an lei laihte en fel; thal chhungin mi tinin tuidawn leh tui paihna mumal taka siam a, tui chhe paihna kawrpuiah tha taka luanluh tir; khaw tin/ veng tinin an huam chhunga lui leh kawrte hnawhtu a awm leh awm loh leh a him tawk em tih enfel; thing zar leh thingzar ro tluk hlauhawm thenfai; kham/ kawngko sanga lung tla leh leimin mai thei a awm leh awm loh en fel; mahni huamchhunga lei tlahniam hlun leh min thinna hmunah, chhiatna nasa zawk thleng thei turte uluk taka enfel; thlanmual a him leh him loh enfel; fur ruahpui leh thli-ah chenna in a him dawn loa a lan chuan chhuahsan rih mai, tihte a ni. Central YMA-in ngenna a tihchhuah hi kan zawm tha a nih phawt chuan, chhiatna leh harsatna thleng tur tam tak kan pumpelh ngeiin a rinawm.
Cyclone Remal kha kan la hre theuh ang a, scientist-ten thli tleh chak zawng te, a hrut tur ram te, lo hmachhawn dan tur te mipui an hrilh lawk a, mi tin kha kan phu suau suau a ni ber a. Mizoram erawh vanneihthlak takin a rawn hruk na lutuk ta lo a, mahse kan lo inralring viau a nih kha.
Kum tina furpui kan tawrh dan hi kan hre theuh tawh a, tuihawkin luanna tur mumal a neih loh avangin kawngpui a zawh a, khawi khawiah emaw a luang liam a, chu chuan leimin te a siam a, tuiluankawr kan neih chhunte bawlhhlawha kan hnawh pin thin avangin tuihawkin kan kawngpui dungah bawlhhlawh tawp leh rimchhe tak tak a rawn len chhuak a, chutiang chuan eng harsatna emaw ber hi chu Furpui hian a rawn thlen ziah a, Cyclone Remal aia chiangin kan hmelhriat tawh a nih hi. Chuti chung chuan, Furpui a lo thleng a, a ngaite bawkin, silpaulin kan sem leh chur chur a, kan chuti kum tin mai chu a ni ber.
Fimkhur thla te kan ti a, tih loh ai chuan a tha hrim hrim, mahse a ‘Thla’ chauh hi kan ngaipawimawh mai ang tih erawh a hlauhawm. A nihna takah chuan tuna fimkhur thlaa ti tura kan inngente hi kum tluana kan buaipui tur a ni a, April thla te hi chu a saptawng takin ‘inpection’ neihna hun ni thei tawh se, kan sawtpui lehzualin a rinawm.