Barcelona leh PSG te an chak ve leh

April 9, Nilaini zan khan UEFA champions league quarter-final khelh chhunzawm a ni a. La Liga club lian FC Barcelona leh French Ligue 1 champion Paris St-Germain ten hnehna an chang ve leh a,semi-final an hnaih leh zual. Barcelona 4-0 BDortmund
Spanish La Liga club lian FC Barcelona chuan Germany club lian Borussia Dortmund an mikhual. Catalan club lian Barca hi an mualah an khel tha viau a, 4-0 ngawtin hnehna an chang. Quarter-final thawh khatnaah 4-0 ngawta hnehna an chang vangin Barca hian semi-final an hnaih hle tawh.
Dortmund lakah chak tura rinkai zawk Barcelona hian an mualah bul an tan tha viau a, season kal meka chetha tak Raphinha chuan minute 25 naah hmahruaina goal a thun. Hma takah goal an thun vangin inringtawk hle mah se Barca hian goal an thun belh thei lawk lova, 1-0 a hmahruai chungin chawlhlawk an hmang.
Chawlhlawk hnu lamah Barcelona an khel tha leh zual a, goal an thun thuai. Second half tan atanga minute hnihna lekah Robert Lewandoski chuan an goal hnihna a thun. Mikhual an nihna hmunah goal hnih an chhuah zawn vangin Dortmund an buai a, an si phur sut tur khawpin game awmze nei an khel chhuak thei lo.
Dortmund an talbuai laiin Barca an khel tha tulh tulh thung a, goal hnih an thun belh leh. Minute 66 naah Lewandoski chuan Barca goal thumna a thun zui leh a, darkar khat an khelh chuan meuh chuan chak zawk tur a chiang deuh kuarh tawh. 3-0 a hma an hruai hnu hian rawlthar duhawm Lamine Yamal chuan minute 77 naah an goal lina thunin a tawp a khar a, Barcelona chuan an mualah 4-0 in hnehna an chang zui ta a ni.
Quarter-final thawh hnihna hi Borussia Dortmund khelmual Signal Iduna Park a khelh tur ni bawk mah se si lo fai ngawt an hnufual tawh vangin German club tan Barcelona hi lehthlal harsa viau tawh tura ngaih a ni a. Barcelona hneh let a, quarter-final lut tur chuan Dortmund hian thil mak an thlentir a ngai tawh ang. Thilmak a lo thleng tawh thinna, thlen nawn leh thei lo erawh a ni lo.
.
PSG in Aston Villa an lehthal
Champions League-ah rin phak baka khelh tha Aston Villa hi an lenluhna mual Parc des Princes-ah an khel tha leh viau a, goal thun hmasa zawkah an tang. Darkar chanve an khel pelh hret hnuin Villa tan hian Morgan Rogers chuan minute 35-naah hmahruaina goal a thun. Goal thun hmasa zawkah Villa an tang hi inkhel tihmuhnawm zualtu a ni a, PSG nawr let a hmuhnawm nghal hle.
Morgan Rogers goal thun hian PSG a chhaihkwlh a, an khingpuite an chhang let nghal thuai. Goal an chhuah atanga minute li hnu lekah PSG tan hian Désiré Doué chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah PSG an khel tha chhunzawm a, goal an thun belh leh thuai. Minute 49-na lekah Khvicha Kvaratskhelia chuan hma an hruai letna goal a thun. Second half tira an si phurh hi Villa in an sut thei lova, goal an chhuah belh leh ta zawk. Hun pangngai tawp hnu, hun pek belh minute 90+2-ah Nuno Mendes chuan PSG goal thumna a thun a, an mualah 3-1 in an chak zui taa a ni.
Aston Villa hian an mualah PSG hi an mikhual ve leh dawn a, inlehthalna lian thlentirin, semi-final luh ngei tumin an mualah tan an khawh ang. PSG hian Liverpool an lo hnawtchhuak tawh a, Aston Villa an hnawtchhuak leh thei a nih chuan English club lakah an hawisang khawp ang.
Aston Villa hian hun rei tak hnuah Europe a club te inelna sang ber UEFA Champions League an khel phak ve leh nawlh. UCL-ah team lian pawl ni hauh lo mah se League round atang rengin beisei phak bakin an chetha chho a, direct a last 16 lut zingah an tel. Last 16-ah an chetha chhunzawm leh a, quarter-final an lut. Quarter-final-ah Liverpool meuh pawh hnawtchhuak thei Paris St-Germain an hmachhawn zui leh a. PSG lakah bul tan tha mah se a tawp an khar tha thei ta lo thung.
Star player langsar tak tak; Lionel Messi, Neymar leh Kylian Mbappe te meuh pawh an kawl khawm laiin PSG hian beisei an phak lo thin a, tunah erawh chetha ta viau thung.