A thawh hnihnaah sawhthing la lei tam lo

A thawh hnihnaah sawhthing la lei tam lo
April ni 21-ah Mizoram sorkarin sawhthing a lei tan leh a, sawhthing lei thawh hnihnaah hian tlem azawng tak tak chauh sawhthing hi lei a ni rih tih thu dawn a ni.
Mizoram Agricultural Marketing Board (MAMB) hotute chuan chawlhkar liam taah sawhthing lei tan ni mah se sawhthing hi tam thama lei a ni rih lo tih an sawi a, lei sa hralhna lamah inhman a ngai a, a dahkhawmna hmun tihthawl te a ngaih avangin tun tumah hian sawhthing lei a la tam lo tih an sawi.
“Secondary Collection Centre pahnih khatah quintal 100-200 vel an lei ang a, chu chu a ni rih deuh maiin a rinawm,” an hotu pakhat chuan a ti.
Chawlhkar tharah tam zawka lei tum a nih thu an sawi a, hemi atan hian chawlhkar liam taah khan district pasariha mi tur cheng vaibelchhe 15 release a nih thu leh, tun karah cheng vaibelchhe sarih release leh tur a nih thu te an sawi.
Lei sa hralh leh kawngah harsatna a awm thu an sawi a, a leitute’n an ngam tlawm a, chu chu tuna an harsatna ber a nih thu an sawi.
MAMB hotute sawi danin, IVC Agrovet te’n organic certified bik chu kg-ah Rs 30-in an lei a, hei hi a lei to ber an nih thu, mahse organic certified a tam loh thu an sawi. Mi dang chuan kg-ah Rs 20 velin an lei tlangpui a, Rs 18 leh Rs 19-a lei te pawh an awm thu te, a tir lamah Rs 24-a lei an awm thu te an sawi.
Mizoram sorkar hian February ni 20-ah sawhthing hi a lei tan a, kg-ah Rs 50-a an lei thu MAMB hotute chuan an sawi. April ni 20 thlengin mi 7,689 te hnen atangin quintal 72,003 an lei a, hemi hnu hian sawhthing lei hna hi chawlh zui a ni. Chawlh chhung hian mi thenkhat hnen atanga lei chu a awm reng tho tih an sawi. Chumi hnuah April ni 21 atangin a lei hna hi chhunzawm a ni leh a, mahse tam tham an la lei lo tih an sawi a ni.
A thawhkhatnaa sawithing leiah hian Khawzawl, Saitual leh Champhai district-ah quintal sing chuang lei hman a ni. Aizawl district-ah quintal 2800, Lunglei quintal 8454, Champhai quintal 10543, Serchhip quintal 8412, Mamit quintal 3960, Siaha quintal 1445, Kolasib quintal 1529, Khawzawl quintal 15926, Saitual quintal 12980, Hnahthial quintal 4157, Lawngtlai quintal 1797 lei a ni.