Ui a hri laka la himah ngai

Mizoram thenawm Manipur-ah ui a hri vanga harsatna an tawh avangin March thla chawhnu lam atangin Mizoramah he hri laka invenna lam theihtawpa thawh a ni a, Mizoram hi a la himah ngaih a ni.
AH&Vety department hotute chuan he hri vanga harsatna tawk an la hriat loh thu an sawi a, ui vulhtute’n a hri danna an lak that thu an sawi bawk.
April thla tirah khan damdawi in pakhatah ui a hri vanga lut an awm a, AH&Vety department lamin an han zawh chianin Assam-a zin, a zinna lama uiin a seh a lo ni a, chu bak chu an hriat chinah harsatna tawk an awm lo tih an sawi.
Ui neitute’n tun hnaiah ui a hri danna (anti-rabies vaccine) an la nasa a, Mizoram hmun hrang hrangah ui chiutir an pun thu leh, Manipur hnaih lamah an pung zual nia a lan thu te AH&Vety department lam chuan an sawi. Manipur hnaih khuaah hian department hian a thlawnin hri danna hi an pe a ni.
Inrinni, April ni 26 kha World Veterinary Day a ni a, hemi pual hian Vety Polyclinic, Aizawlah a thlawnin ui a hri danna sem niin, ui 202 an chiu.
AH&vety department hotute chuan thingtlang leh hmun kilkhawr deuhah chuan hri danna la tur hian harsatna an tawh a rinawm thu an sawi a, hei hi thawktu lam indaih loh vang a nih thu an sawi.