Hun reilote chhungin ZPM-in rin hlawh lo – Dr R Lalthangliana

Hun reilote chhungin ZPM-in rin an hlawh loa, sawrkar hnathawk leh mipui rin an hlawh tawh lo hle tih MNF hruaitu Dr R Lalthangliana chuan a sawi.
Khawzawl district MNF VC tling tharte chawimawina hun siam a hmanpuinaah MNF senior vice president chuan, tunhmaa kalphungah chuan ruling-in village council-ah 70%/ 80% an la thin a; ZPM chuan an sawrkar laiin majority an la thei tawk chauh tih a sawi.
Sinlung Hills Council bial 12 awmah bial 7 MNF-in an la a, hmun thenkhatah an party ami thoten an din thuah chung pawhin hneh takin an la tling thei tih a sawi bawk.
Local council 85 vel awmah MNF chuan an sawrkar laiin an la fai deuh vek tih MNF hruaitu hian a sawi a. Tunah ZPM chu an tling tawk tawk chauh, tiin, “An hun reilote chhung hian sawrkar hnathawk leh mipui rin an hlawh tawh lo hle a ni,” a ti.
ZPM-in an sawrkar hmain Rs.50 in sawhthing rate an siamsa a, tunah quintal nuai 10 chuang lei loh la awm chu engtin nge an tih zel dawn tih Dr R Lalthangliana hian a zawt.
“MNF sawrkar sum hnutchhiah cheng vaibelchhe 150 atangin cheng vbch. 40 chu health care-ah an dah a, ba rulhnan an hmang a, vbch. 110 thlai thar leinan kan dah an ti a. Sawrkarin kg khatah Rs.30 in kan subsidise sak dawn an ti a. Heti zat subsidise-na hi thil inthup rapthlak tak, nakin lawka lang chhuak leh mai tur, sawhthing chingtute rawkna nasa tak a awm mai lo’ng maw,” tiin sawrkar a zawt.