U20 NFC-a tel tur Mizoram team thlah

U20 NFC-a tel tur Mizoram team thlah
MFA assistant secretary Lalbiakzuala kaihhruai Mizoram team thlahna hunah hian MFA president Lalnghinglova Hmarin thu sawiin, huaisenna nena khel turin player-te a chah a, Mizoram leh anmahni ngei tan pawha he intihsiakna hi a pawimawhzia sawiin, champion trophy nena lo haw ngei tura a fuih bakah an inpuahchah chhung zawnga discipline tha tak an nei chu lawmawm a tih thu a sawi bawk.
MFA executive committe member Zaihmingthanga’n Mizoram team tan tawngtaina hun hmangin, Lalruatsanga Tochhawng (vice president), Lalrengpuia (honorary secretary) leh MFA hruaitu dangte’n he hun hi an hmanpui.
Coach H. Lalrindika Hmar kaihhruai Mizoram team-ah hian player 18 thlan niin, manager atan Lalnunsanga leh physio atan Lalengkimate ruat an ni.
U20 NFC hi Narainpur, Chhatisgarh-a khelh tur niin, Mizoram hi Group D-ah Jharkhand, Tripura, Maharashtra leh Himachal Pradesh-te nen an awmho a, May ni 14, 2025 hian Maharashtra nena inkhelin bul an tan ang.

Mizoram fixture

May 16 vs Himachal
May 18 vs Tripura
May 20 vs Jharkhand