Racket theihnghilh chunga chak Coco Gauff!

Racket theihnghilh chunga chak Coco Gauff!
Thawhlehni khan Roland Garros runner-up pawh lo ni ve tawh USA mihang nula Coco Gauff chuan court chhunga racket kenluh theihnghilh chungin first round hnehna a chang tho!
French Open first round match-a Australia player Olivia Gadecki hmachhawn tura court a luh laiin Gauff hian racket a ak lo tih hre miah loin bag ruak a rawn ak lut awh awh a, a bag-ah chuan engmah a awm lo tih a hriat hnuah amah buaipuitute chu ip ruak a kawhhmuh a, a rang a rangin an va laksak a, chu boruak chuan French Open title chaka a tuihal huam huamna erawh a tibuai pha lo a, Gadecki lakah hnehna awlsam 6-2, 6-2 a sualchhuak zui ta tho a ni.
Inkhelh bana Sloane Stephens nen an inkawmnaah Gauff chuan, “Dawt sawi miah lo chuan ka bag-ah khan ka racket-ho kha an thun vek turah ka ngai a, ka court bag-ah pawh a awm tur ang ang drink leh thil dangte pawh a awm vek a.
“Chu rinna avang chuan ka bag ah lai kha a zang duai tih pawh ka lo hre reng reng lo a; ip ruak ak chung chuan court ka han lut a, zipper hmasaber ka han pawt hawng chu racket a lo awm lo phawt a, OK ka ti mai a, zipper dang ka han hawng leh chu ‘Oh my God a ni ta a, racquet tel loin court-ah ka lo tla lut hi a lo ni a!
“Tih dan phung pangngaiah chuan JC (coach Jean-Christophe Faurel) hian ka bag-ah min thunsak tlangpui thin a,” tiin a hun tawn nuihzatthlak a sawichhuak.
French Open inbuatsaihna tournament lian pahnih Madrid leh Rome-a finalist ni ve ve Gauff chak rual hian Roland Garros hmuna runner-up lo ni ve tawh dang Sofia Kenin pawhin second round a lut ve bawk a, 6-3, 6-1-in French number one Varvara Gracheva a hneh.
Inkhel dangah player hriat hlawh lo zawk Hailey Baptiste chuan 2023 semi-finalist Beatriz Haddad Maia lakah 4-6, 6-3, 6-1 hnehna a sual chhuak ve bawk.
World number one Victoria Azarenka pawhin record thar nen hnehna hmasa chang ve bawkin, kum 35 mi hian 6-0, 6-0-a Belgium nula Yanina Wickmayer a sawp rualin professional era bikah kum 1968 hnu lama singles Grand Slam main-draw match-a chak thei hmeichhe player upa ber nihna a chang.
Kum 2012 leh 2013-a Australian Open title la zawn thei Belarusian Azarenka hian record dang siam telin, hmeichhiate zinga kum sawm bi thum chhunga Grand Slam double bagel la vek thei hmasaber a ni nghal a, chu mi awmzia chu game khat mah hloh loa Grand Slam match-a chak tihna a ni.
World top 1,000 pawn lama khawsa mek Wickmayer khan kumin nipui thawt laia khelh leh tur Wimbledon zawh ruala tennis a chawlhsan ve tawh tur thu a sawi a; Azarenka lakah c huan a nau deuh a ni!
Two-time major winner Azarenka aia kum 2000 hnu lam bika 6-0 6-0 scoreline hmanga Grand Slam match hnehna chang hnem awmchhun pahnih chu vawi ruk ve ve chak tling Maria Sharapova leh Kim Clijsters-te kha an ni.
Tun kha 2016 Australian Open hnu lama Azarenka-i’n major tournament-a double bagel hnehna a chan leh vawikhatna a ni nghal.
Second round lama Azarenka hmachhawn turin Australian Open winner Sofia Kenin chuan 6-3 6-1-in tualchhung nula Varvara Gracheva a sawp ve bawk.
Inkhel dangah 2023 Wimbledon champion Marketa Vondrousova pawhin Oksana Selekhmeteva lakah 6-4, 6-4 hnehna changin, sixth seed Mirra Andreeva lakah 6-4, 6-3-in Cristina Bucsa a tlawm a, Russian Andreeva hian nikuma semi-final a lo chuankai ve tawh pelin kumin hian final thleng zo tawh tak ang maw?