Thlawhna chuan man to aupui

Thlawhna chuan man to aupui
Rajya Sabha MP K Vanlalvena chuan Mizoram atanga thlawhna chuan man to lutuk chu Parliament Session neih tura party hrang hrang aiawh intawhkhawmah a sawichhuak.
Vawiin, July 21 atang hian August 21 thleng awh tur Parliament Monsoon Session neih a ni dawn a. Tum danga tih thin danin, party hrang hrang aiawhin a thlirlawkna leh inbuatsaihna atana thutkhawm koh – All Parliamentary Floor Leaders meeting chu Pathianni khan neih a ni a. Thusawi tura hun pek a nih angin Mizoram Rajya Sabha MP hian Lengpui to Delhi inkar thlawhna chuan man to lutuk chungchang a sawi chhuak.
Kumin July 9 khan Aizawl atangin Delhi-ah a chhuk a, Indigo thlawhnaah chuangin, a thlawhna ticket man hi Rs. 25,951 a ni a, chu chu Delhi to Jakarta (Indonesia khawpui) thlawhna chuan man ai pawha to zawk a ni tih K Vanlalvena hian a sawi. Hei bakah hian kumtinin Krismas dawn December chhoah thlawhna ticket man Delhi to Aizawl hi Indigo Air service-in a tih san bik ziah thu a sawi a. Sawrkar laipui chu he harsatna hi sutkian sak turin a ngen tih a sawi a ni.
Mizoram MP chuan Ka thusawi hian thutkhawma tel MP dangte beng a verh viau nia a hriat thu sawiin, a sawi lai pawh hian an lo thum deuh hak niin a sawi.