Shelton kutah Masters 1000 title lut ve ta nge nge

American fourth seed Ben Shelton chuan set hmasa ber hloh zet chungin karliamta khan Tornto khawpuia Canadian Open final-ah 6-7(5), 6-4, 7-6(3)-in a khingpui Russian 11th seed Karen Khachanov a hneh a, a career-a a vawi khatna atan ATP Masters 1000 title a hlawhchhuak ve ta.
World number seven hi Canada ramah a khel tha hle a, final luhna kawngah Italian 13th seed Flavio Cobolli, Australian ninth seed Alex de Minaur leh American second seed Taylor Fritz paltlangin a tennis zinkawnga a title hraw ber a sualchhuak ta hial a ni.
Kum 22-a upa hi kum 2004 daih tawha Miami champion leh world number one hlui ni bawk Andy Roddick hnu lama American mipate zinga Masters 1000 title la thei naupang ber a ni a; Toronto-a champion hma hian Tokyo (2023) leh Houston (2024)-ah a title hmasa pahnih a lo hlawhchhuak ve tawh a ni.
Australian Open semi-finalist Shelton hian US Open inbuatsaihnaa trophy a lak avangin vawiina ATP ranking thar tarchhuahah world number six nihna dinhmun a luah chho ta a, a career-a ranking a luahsan ber tum a la ni.