Mizo baller chhuanawm rual
Mizo baller chhuanawm rual
Mizo kan sang tawk lo, chawn puar ping peng, bawp tawi tia indeuhsawhna tawngkam ngeiawm chhakchhuaktute thawm a reh tial tial a, hmasawnna erawh hmuh tur tam tak a awm thung.
Basketball hi san ngai game mah ni pakhat ve lek mah se thiam erawh a pawimawh zawkin, a thiam tan chuan hamthatna a tam tial tial.
An basketball thiam avangin Mizo player tam takin hamthatna an chan, sawi zui ni ngai lem lo karah Kristu Jayanti (Deemed to be University), Bengaluru-ah Mizo basketball player paruk zet chuan an inkhelh thiam zarah free scholarship hmuin, he college hming tha zet hi an pan zui tawh nghe nghe.
PC Lalruatfela, Tuaitea tia hriat lar chuan, “Scholarship hian a fun tel hmathatna chu kan college-a kal man hi engmah kan chawi lo va, hostel a free vek bawk. Chu mai bakah, hostel mess pangai ei loin Mizo chaw kan ei avangin a hranin kan einaah ei man min tum sak vek bawk a, engkim a free ang a ni mai – kan vannei hle,” tiin a sawi.
Hoops Mania The Aizawl Post zawhna chhang chhunzawmin, “Zing dar 6:30-ah practice kan tan hian first period zing dar 8:00-a nei an awmte a nih loh chuan dar 9:00 atangin class kan kal tlangpui a, kan inkhelh hian zirna lam a tibuai hran hauh lo! Zirna hi kan ngai pawimawhin kan kal chhan ber pakhat a nia,” tiin Tuaitea chuan a tarlang.
Hetianga vanneihna chang tur hian college lama thuneitute’n Mizorama basketball invawrhsanzia leh Mizote’n an thiam tzia hriain India rama basketball league ngaihven hlawh ber leh tha ber Mizoram Super League (MSL) vela Mizo player rawlthar zirlai chetlate an lo thlithlai reng a; he’ng mai bakah hian inter school leh college intihsiakna thlengin an lo belhchian ve zel avangin college thuneitute hian player-te hi an rawn sawm mai bakah Aizawlah trial-te neih a ni.
Zirna leh infiamna hi nghet takin Mizo basketball community-ah hian a insuihzawmin a inthlunzawm chial a.
Hawla Indoor Stadium chhung ngeiah pawh MBBS zirlai a nih laia nunna chan ta, Lalthankhuma Chhungte chuan Khuma thlalak fiah tak hmaah zirna leh infiamna inhnetawna kal thei a nihzia a tarlang nghe nghe.
Zirna hlamchhiah lo zawnga infiamna huanga ke pen lutte tan zirna kawngkapui zau taka hawnin a awm e.
Mizo val vanneihna changte chu :-
1. C. Lalrinawma – Luangmual
2. H. Lalhmachhuana – Khatla South
3. Lalhmingsanga – Chawlhhmun
4. Lalrinsanga Fanai – Nursery
5. Rinsangliana Chawngthu – Mission Vengthhlang
6. PC Lalruatfela (Tuaitea) – Dawrpui Vengthar