AIFF prank-tu rawlthar kha…

Kan hnung deuh Indian senior men’s team football head coach hnaruak dilna e-mail kaltlanga lut zinga Spanish coach lar pahnih Pep Guardiola leh Xavi Hernandez-te hming rtawn lang ve nawlh khan Indian football-ah titi lian a siam nghal a, mahse, All India Football Federation (AIFF) lamin an han chhuichian deuhin anmahni ngei an ni tak tak em tih finfiahna an hmu lo a, shortlist thlanchhuah 10 zingah pawh an telh duh ta lo a nih kha!
A hnuah kha thil kha Vellore Institute of Technology-a zirlai kum 19 miin AIFF a prank-na tih hriatchhuah a ni a, a inpuanna pawh Telegraph Online chuan a tichhuak tawh nghe nghe a ni.
Spain leh Barcelona legend Xavi hmingin he zirlai hian e-mail id lem (xaviofficialfcb@gmail.com) siamin, chu mi kaltlang chuan Xavi Hernandez hmingin Indian football team head coach hna dilna a lo thehlut lek chu lo niin!
Telegraph Online tarlan danin, he zirlai hian ChatGPT chu Xavi Hernandez hminga Indian football team coach hna ngaihven thu a ziahtir a, a sawi danin:
“ChatGPT ziah ang ang chu ka copy paste a, e-mail hmangin ka thawn ta a ni. Ka mail-ah chuan mimal chanchin kimchang (CV) emaw thildang engmah ka thil tel lo a, mahse, ka mail kha an hmu thoin ka ring,” a ti!
An sawi zel danin he nau hian tum hnih ngawt email hi AIFF hnenah a thawn a; an hmuh phat atangin AIFF lam chuan ‘prank’ a nih an ring nghal a, thuchhuah an siamah pawh Xavi hminga an e-mail dawn chu a rintlak tawk lo tiin an tarlang a, head coach atana thlanchhuah tur shortlist candidate hming pathum an tarchhuak zui ta a nih kha.
AIFF thuchhuah han tarlang nawn leh ta ila:
“Spanish coach pahnihte hminga application dawn a ni a, a ziaktu tak tak hi hriatchian theih a nih loh avangin he e-mail application pahnihte hi pawmtlak loha ngaih a ni,” tiin.
Thuchhuah an siam hma ni chiahin AIFF lam hian khawvel midfielder ropui zinga mi, football khelh a bansan hnua coach ni zui ta Xavi application an dawn chu a rawihna man a san dawn avangin an buaipui zui thei lo tih an lo sawi tawh reng reng a, Xavi-te ang rawihna chu federation budget-in a pha lo hrim hrim tih an sawi tlang nghal.
AIFF lam miin PTI a hrilh danin, “Aw, ni e, he hna atan hian Xavi chuan a rawn apply ve ngei a, amah ngeiin technical committee-ah e-mail hmangin application a rawn thehlut a, a ziah danin kan hna zawrh lai hi a ngaihven hmel khawp mai,” tiin a sawi a, hetih lai hian zirlai pakhatin AIFF hi a prank tih an la chiang bik lo a nih hmel!
Tarlan tawh thin angin, AIFF chuan shortlist pathum a tarchhuahah Spanish coach pahnih hi an telh ta lo a, thlanchhuah pathum atangin AIFF executive committee lamin Indian Super League club Jamshedpur FC head coach Khalid Jamil chu Blue Tigers boss atan an thlangchhuak ta a nih kha…