Jake Paul leh pa tawi Davis inhnek dawn

Jake Paul leh pa tawi Davis inhnek dawn
Taksaa tattoo chhu nasa ve ve Jake Paul leh WBA lightweight champion Gervonta Davis-te chu kumin November ni 14 khian Atlanta, Georgia-a exhibition fight-ah an intawng dawn.
An inlenhleih leh rih zawng an an inthlauh em avangin pawhin an intawn turah hian Davis-a title kawl lai chu thap a ni dawn lo.
Youtuber lar a nih hnua boxer-a inlet ta Paul-a hi sap rih zawng tehna hman lar pound 200 zeta rit a nih laiin feet 5 leh inchi 5 leka sang Davis hi 135lb leka rit a ni thung.
American professional boxer, influencer leh actor ni bawk Paul-a hian Disney Channel kaltlangin hmingthanna a lo hlawhchhuak tawh a; chutah boxing khawvela a intahluh hmain ‘influencer’ lar a ni leh a; professional boxing a luhchilh hnua a record hi a chhe hran lo a, vawi 12 chakin, tum khat chiah a la tlawm.
January 17, 1997-a piang Paul chuan X-ah a tumpui tur chu khawvela pound-for-pound boxer thaberte zinga mi ni mah se a thupui chu tu pawh, engtikah pawh, khawi hmunah pawh tuktluk zel a nih thu a sawi!
Pa te reuh te zawtah hian pa lian British heavyweight Anthony Joshua lam hawi zui leh a tum a, media-te chuan inbiakna pawh kalpui tawh a nih thu sawiin, amah Paul-a ngei pawhin, “Davida ka han tuktlawm zet ang a, chu tah Goliatha lam kan hawi zui leh ang chu,” tiin a hmachhawp Joshua chungchang a sawichhuak.
Joshua promoter Eddie Hearn pawhin tunhnai khan BBC Sport hnenah Paul-a chu heavyweight champion tum hnih lai ni tawh Joshua hmachhawp a nih theih thu sawiin, nakkum hian hliam atangin Joshua a kirleh tawh tura ngaih a ni a, chu ta a elpui hmasa tur atan Jake Paul chu tinzawn a nih thu a lo sawi ve tawh bawk.
Kum 28 mi Paul hian a inhnek hnuhnung berah kumin June thla mai khan kum 39-a upa world champion hlui Julio Cesar Chavez Jr chu unanimous decision-in a hneh a; a hma leh deuh, nikum November thla khan kum 58 mi ni tawh chunga la hmuhnawm tho Mike Tyson pawh a lo tukdawl tawh a nih kha!
Kum 2020-a a professional debut a nghahchhuah hnu khan Paul hian boxing chhungkuaah a theihna a pholang kal ve zel a; YouTuber, NBA player leh UFC fighter hlui pathum a hneh hnuah kum 2023 khan Paul hi a vawi khatna atan a tlawm a, kha mi tuma a ngam lo hkha Tommy Fury niin, kha kha tun thlenga a chak loh awmchhun a la ni.
American Davis pawh hi a pumrua atang ringawta teh chi a ni hauh bik dawn lo a; professional fight tum 31 a paltlang tawhah tlawm a la nei lo a, vawi 30 chakin, tum khat draw a nei a, a chak vawi 28 phei chu knockout hmangin a ni nghe nghe.
Davis hian kumin March thla khan Lamont Roach Jr inhnehtawkpuiin a WBA lightweight title kawl lai a humhim a; January thla khan pound-for-pound ranking-ah number eight a ni bawk.