Premier League record thar kan hmu

Premier League record thar kan hmu
Leeds United-in nimina pound maktaduai 18 senga AC Milan striker Noah Okafor an lei rual chiah khan nipui transfer inhawn laia Premier League club-te sum sen belhkhawm sang ber record ding lai chu khum a ni ta chiah a, kumin nipui bazar-a English top flight club-te player leina sum belhkhawm chuam pound vaibelchhe 2.37 a kai chho ta a ni.
Switzerland striker Okafor hian Premier League club-ah kum li daih tur contract ziak nghalin, tun nipui thawt laia Leeds player sengluh thar pakuna a ni tawh a, Championship atanga top flight-a an kirleh hnuah squad thuamchak turin an buai ve hle a ni.
Kum 25 mi hian naupang a nih lai atangin Premier League-a khelh chu a tum ber a nih thin thu leh khawvela league tha ber khela field luh thuai thuai hlan a nghahhlelh thu a sawi.
Premier League club-te’n transfer window vawi khata sum an hman hnem ber record kum 2023-a siamah khan pound vaibelchhe 2.36 khawhsal a ni a; Leeds-in Basel, RB Salzburg leh Milan thuam inbel tawh Swiss mihang an sengluh rualin record thar a lo piang ta a ni.
‘The biggest transfer window ever’ ni ta hi FootballTransfers.com lamin an puan a ni a; Elland Road-a Okafor-a lut hi a titlingtu pakhat mai niin, he record thar puitlin tur hian September ni 1-a khar fel tur tun nipui transfer window kal mekah hian Premier League club paruk laiin an club transfer record ding lai an khum tawh a ni.
Brentford chuan Burkina Faso forward Dango Ouattara manah Bournemouth chu £42.5m zet an pe tling dawn a; Bournemouth pawh hian French centre-back Bafode Diakite leina sum £34.6m an phawrh ve tawh bawk.
Top flight-a kai thar Burnley leh Sunderland pawh an inlei nual a, Burnley hian French midfielder Lesley Ugochukwu mana £25m an sen laiin Sunderland hian Senegal midfielder Habib Diarra manah £26m an pe phawt a, a khelh dan azirin a man hi £30m kai chho thei turin an inrem.
Transfer record thar siam dang Nottingham Forest phei chuan tun nipui thawt chhung hian tum hnih record an break taw a; a hmasa zawk chu Bologna atanga Switzerland winger Dan Ndoye an lakchhuah tum khan niin, Ipswich atanga winger Omari Hutchison leina’na £37.5m an phawrh tum khan record an siam leh bawk.
Kumin June thla khan Liverpool chuan Florian Wirtz manah £100m zet Bayer Leverkusen pe tawhin, an inrem danah boruak a kal fuh chuan £16m (add-ons) la chhunluh belh thei an la ni cheu bawk!
He add-ons hi a nung ta a nih chuan Anfield-a Wirtz-a luh man hi British transfer record thar a ni thei dawn a, kum 2023-a Chelsea-in Argentina midfielder Enzo Fernandez mana Benfica hnena an fee pek £107m kha a khum dawn a ni.
Transfer tukverh khar hmain vawiin nen ni kua a la awm a, Premier League transfer record thar kan hmuh mek hi a la invawrh sang duai thei bawk.