City-ah defender Dias a nghet

Etihad club a zawm hnua trophy 10 zet chawi tling tawh Portugal international Ruben Dias chu Manchester City-ah a la nghet sauh sauh a, nimin lam khan kum hnih dang cham belh tura a contract neih lai pawtsei lehin, kum 2029 thleng City thuam a la inbel chhunzawm thei dawn a, chu mi hnu lamah pawh thla 12 dang la cham leh thei turin inremna tharah chuan an ziak kai.
Kum 28 mi contract nei hlai kha kum 2027-a tawp tur niin, an lo la inchhangkham lo hle tih a hriat a, contract thar ne n season bul a tan thei ta a ni.
Portugal defender hi kum 2021 khan City chuan Benfica atangin £65m-in an senglut a, a season hmasaber a hman zawh rual khan Premier League player of the year atan puan nghal a ni.
England a thlen phat atangin City player pawimawh a ni chho nghal a, Etihad Stadium-a kum nga lek a khawsak tawh chhungin season liamta thleng khan league title pali bakah Champions League, EFL Cup leh FA Cup pakhat diat diat a hawnsak tling tawh!
Chuti ang mi chuan nimina contract thar a ziah zawhah a hlim em em thu sawi chungin, Manchester khua chu a hmangaih a, tunah chuan a home a nih tawh thu leh Manchester City fans pawh a hmangaih hliah hliah thu a sawi.
“He hmuna ka cham chhunga kan trophy lak tawh zozai leh kan football khelh dan ka ngaihtuah hian hmun danga han pembo thei ni hian ka inhre lo.”
City director of football Hugo Viana pawhin Dias chu dressing room leh khelmual chhunga hruaitu dik tak tiin a fak ve hlak bawk.
Etihad club hian an contract neih laia kum khat bak cham thei tawh lo tur John Stones leh Bernardo Silva-te bakah thla 12 hun nei tling tawh lo Ilkay Gundogan leh Ederson-te hmalam hun pawh a chingfel chho zui tura ngaih a ni.
Spanish midfielder Rodri, England playmaker Phil Foden, Swiss defender Manuel Akanji leh Dutch centre-back Nathan Ake-te chuan kum hnih lai hun an la neih avangin anni dinhmun hi chu tlemin a hmanhmawhthlak dep deuh awm e.
Tun dinhmuna inchingfel leh hnaivai ber tura ngaih chu defender Rico Lewis niin, kum nga daih contract thar a ziah an ring.