Zelensky-a’n an ram zalen nan beih zel tum

Zelensky-a’n an ram zalen nan beih zel tum
President Volodymyr Zelensky-a chuan muanna a awm theih nana an aw chuan ngaihthlak a hlawh loh laiin Ukraine-in a zalenna atana a bei zel dawn tih a an ram independence day thuchah a sawiah a tar lang.
“Muanna chauh kan mamawh a, muannaah chuan kan hma hun turah keimahniin thutlukna kan siam thei,” tiin Pathiannia thuchah a sawiah a tar lang a. Ukraine chu ‘a tuartu ni lovin, a beitu’ a nih thu a sawi bawk.
“Ukraine hi a la chak lo va; mahse, a chak lo zawk pawh a la ni chuang lo,” a ti bawk.
Zelensky-a’n thuchah a sawi hma lawk hian Moscow chuan Ukraine chu a hma zana Russian khawthlang lam, Kursk region-a power leh energy hmun beiah puihin nuclear power plant-ah kangmei a chhuah phah niin a sawi.
Ukraine sorkara Centre for Countering Disinformation chuan drone kah thlak perin kangmei hi a siam niin a sawi thung.
Centre hian Russia chu ‘thu dik tawk lo’ vawrh darhah puhin Ukraine chu Russian-te tih dan thin zawk, power plant beihah a puh niin a sawi bawk.
Hliam an awm lo va, kangmei chhuak pawh rang taka thelh mih nghal a ni tih plant-a press service chuan messaging app Telegram-ah an tar lang a. Transformer erawh a chhia a, radiation level pawh a hlauhawm pha lo tih a sawi.
UN International Atomic Energy Agency (IAEA) director general chuan ‘nuclear hmunte chu engtik hunah pawh venhim’ a tul thu a sawi nghal.
IAEA hian Russia leh Ukraine hi an indonaah nuclear hmunte inbeihsak tawh lo turin a lo ngen tawh thin.
Pathianni vek khan Russia leh Ukraine hian mi tang inthleng lehin lehlam lehlam hian sipai 146 an inhlen tawn niin a sawi.
Zelensky-a chuan Russia hian sipai, ramri vengtu leh civil mi a pe kir a, a tam zawk hi kum 2022 atanga an mante niin a sawi.
Ukraine hian an Independence Day hi Kyiv-ah lawmin kum 1991-a Soviet Union atanga an indan champha a ni.
Canadian Prime Minister Mark Carney-a pawh a lawmnaah telin Zelensky-a bulah St Sophia’s Cathedral-ah thu a sawi a. “Thu mawl leh pawimawh tak ka sawi duh a, Canada hi Ukraine kiangah a awm reng ang,” a ti.
September thla tirah drone, silaimu leh armoured vehicle-te chu Ukraine-ah an thlentir dawn a, hei hi Canadian $ tluklehdingawn hnih hua puih a tumna zinga mi a ni tih Ukrainian chanchinbuten an tar lang.
US palai, Keith Kellogg pawh telin Zelensky-a’n Order of Merit a hlan nghe nghe.
Kum 2022 kum tira indo tan, Ukraine leh Russia inbeihna hi tihtawp tumin hmalak mek zel a ni bawk. August 15 pawh khan US President Donald Trump leh Russian President Vladimir Putin chu Alaska-ah an inbia a ni.