Forest tan loan-a khel tur Luiz

Forest tan loan-a khel tur Luiz
Brazilian club Vasco da Gama lama career bul tan Douglas Luiz chuan tun season hi loan-in Nottingham Forest tan a khel dawn a, an inrawih fuh dan azirin nakkum nipui insuan hunah a nghetin Juventus a chhuahsan thei dawn. Chu chu an inrem dan a ni.
Kum 27-a upa Brazil midfielder hian kum khat kalta mai khan Aston Villa chhuahsanin Serie A club Juventus chu £42.35m-in a zawm a, Turin club-ah kum nga daih contract a ziak.
Villa tan khan Luiz hian inelna hrang hrangah match 204 khelin, Italy a pan hma khan 2023-24 season-ah Premier League game 35 khelin goal kua a khung.
Serie A club lian hnuchhawna Premier League a pan leh chhan sawiin, Forest chu hmachhawp nei club hmuha a hmuh vang niin a sawi a, a team thar ruala bul tan thuai thuai a chak tawh thu leh fans leh club tana a theihna sang ber hlan a tum thu a sawi.
Forest hi tun nipui bazar-a club phe buai ve tak niin, karliamta mai khan an manager Nuno Espirito Santo chuan club thuneitute hnenah transfer market-a club insengkhawm dan a sawisel a, kha mi hnu khan an che ta sawk sawk a ni ber!
Tun season-a Europa League khel tura an inbuatsaihna kawngah player pasarih lakluhna’n £140m vel an seng tling tawh.
Ipswich Town atanga England Under-21 winger Omari Hutchinson an leina fee £37.5m chu sum hrawm lian dangleh niin, midfielder James McAtee leina manah Manchester City chu £30m an pe a;Thawhtannia an lakluh Rennes striker Arnaud Kalimuendo sum hmahruai atan £26m an phawrh tawh bawk.
He thu buatsaih lai thlenga an player tharlam ber Luiz hian Brazil tan match 18 khel tling tawhin, August 2021 khan Tokyo Olympics gold medal a awrh bawk.