Station 25-ah tui lian hlauhawm tak la awm mek

Station 25-ah tui lian hlauhawm tak la awm mek
Central Water Commission (CWC) chuan ram chhunga station 25-ah tui lian nasa tak a thleng tih Thawhtanni khan an sawi a. Heng zinga 12 chu Uttar Pradesh-ah a ni a, Bihar-ah 10 leh Jharkhand, Rajasthan leh West Bengal-ah pakhat theuh a ni.
Station dang 20, Uttar Pradesh-a pakua, Bihar-a panga, Assam-a pali leh Delhi leh West Bengal-ah pakhat chu a pangngai aia lian an ni bawk.
Karnataka, Andhra Pradesh, Telangana, Gujarat, Uttar Pradesh, Tamil Nadu, Madhya Pradesh, Rajasthan, Odisha, Arunachal Pradesh, Jharkhand, Maharashtra, West Bengal leh Uttarakhand-a tuikhuah 42-ah tui a la luan luh belh zel dawn niin an sawi bawk.
Uttar Pradesh-ah hian Yamuna chu Mathura, Agra, Etawah, Kannauj leh Auraiya-ah lian hlein Ganga pawh Ghazipur, Fatehpur, Ballia, Budaun, Kanpur leh Varanasi-ah hlauhawm tak a ni pha a. Ghagra chu Ayodhya leh Ballia-ah lian tak a ni bawk.
Bihar-ah Ganga chu Patna, Bhagalpur, Munger leh Saran-ah a lian hle a. Kosi chu Supaul leh Khagaria-ah, Gandak chu Vaishali leh Burhi Gandak pawh Khagaria-ah hlauhawm khawpin a lian.
Gujarat-ah Narmada, Tapi, Damanganga, Mahi, Sabarmati, Anas, Som, Rel leh Banas luite chu ni thum lo awm leh tur thlengin a pangngai aia nasa leh hlauhawm tak thlenga la lian thei an ni bawk.
District zingah Sabarkantha, Banaskantha, Mehsana, Aravalli, Mahisagar, Ahmedabad, Gandhinagar leh Kheda-ah inralrinna tihchhuah a ni a. Ukai, Sardar Sarovar, Madhuban, Kadana, Dharoi leh Dantiwada tuikhuahah nasa takin tui a luan luh belh dawn bawk nia sawi lawk a la ni.
Rajasthan-ah Sabarmati leh West Banas luite chu Banswara, Dungarpur, Udaipur leh Sirohi district-ah a lian hle a. Banas leh a pengte pawh Chittorgarh, Bhilwara leh Rajsamand-ah hlauhawm takin a la lian bawk.
Som Kamla, Mahi Bajaj Sagar, Kalisindh, Rana Pratap Sagar, Jawahar Dam, Bisalpur leh Kota Barrage-ah tui tam tak la luan luh belhin a la liam dawn a, hlauhawm a la ni thei nia sawi lawk a ni bawk.
West Bengal-ah Ganga chu Farakka, Murshidabad-ah hlauhawm khawpin a la lian a. Teesta pawh Cooch Behar leh Jaldhaka, Jalpaiguri-ah a pangngai aia lianin a chim chin a san belh rih zel bawk.
Assam-ah Buridehing chu Tinsukia-ah hlauhawm khawpin a la lian a. Brahmaputra chu Jorhat, Sivasagar, Tezpur, Dhubri leh Goalpara-ah a la lian nasa hle a, a pengte pawh Dhansiri leh Desang-ah a pangngai aia chim sang fe a la ni.
Uttarakhand-ah Aglar chu Tehri Garhwal-ah hlauhawm khawpin a la lian a. Song chu Dehradun leh Yamuna pawh Uttarkashi-ah a pangngai aiin a chim sang hle a. Madhya Pradesh-ah chuan Damoh leh Datia-ah tui a la lian hle a, Jharkhand-ah pawh Palamu leh Sahibganj-ah tui lian a la hlauhawm hle.
Tuikhuahte pawh an chim chin a sang zel a. Cauvery kama Krishnarajasagar-ah chuan tui a dawn theih zat 97.7% a tling mek a, Hemavathi-ah 99.6%, Kabini-ah 99.7%, Harangi-ah 97.8% leh Mettur-ah 100% a tling mek.
CWC chuan ruah a sur belh zel chuan tui hi tuikhuahah a luh belh zel dawn a, sah a nih chuan a hnuai lama awmte tan hlauhawm tak a ni thei dawn niin an sawi.