Kum 60 chuang hnua IAF-in MiG 21 thlah dawn ta

Kum 60 chuang hnua IAF-in MiG 21 thlah dawn ta
Indian Air Force (IAF) chuan kum 60 chuang rim taka an lo hman tawh, MiG-21 indo thlawhna chu kum 1963-a an hman tura an kuta hlan a nih hnuah an thlah dawn ta.
Indo thlawhna hi December 14, 1971-a Dhaka-a governor chenna in bomb nan leh kum 1999-a Kargil War-ah pawh khan hman a ni tih ANI chuan a tar lang.
IAF chuan, “Kum 60 chuang hna a thawk a, huaisen taka inlanna tam tak neiin van sanga ram inchhuanna thlentu a ni,” tiin social media-ah an tar lang.
Indo thlawhna hi Tejas Light Combat Aircraft (LCA) Mark A1-in a thlak dawn ta a, IAF hian Tejas indo thlawhna 83 nei turin contract ziah fel a ni tawh.
MiG-21 indo thlawhna hi a tawp nan August 18 leh 19 khan Bollywood film Love and War-a tihlan turin a thlawk a, he film hi Alia Bhatt, Ranbir Kapoor leh Vicky Kaushal te channa a ni.
He film atana thlawhna khalhtu, Air Chief Marshal AP Singh chuan, “MiG-21 hi thlawhna dang lo hmachhawn tura duan a ni a, a chanpual hi hneh taka thawkin India tan chhinchhiahtlak a ni a. Mahse, engkim hian hun leh hmun ruat an nei a, a technology a hlui deuh tawh a, enkawl a harsa tawh a. Chhuan thara luh a ngai tawh a ni,” tiin PTI hnenah a sawi.
MiG-21 thlawhna hi ram 60 chuangah 11,000 chuang hman a ni a, khawvel chanchina supersonic fighter jet siam chhuah hnem ber a ni.
Hetih lai hian IAF thupuangtu, Wing Commander Jaideep Singh-a chuan ram tam takin hmang mah se IAF anga hmang tangkai air force dang an awm a rinawm loh thu a sawi a. “Kei ngei pawhin a mi mal takin inzawmna tak ka nei a, vansangah ka khalh a, ka ngai dawn hle a ni,” tiin a sawi.