Darkar 12 chhung Russia-in Ukraine a beihnaah mi pali thi

Darkar 12 chhung Russia-in Ukraine a beihnaah mi pali thi
Russia chuan van sang atangin darkar 12 chhung Ukraine-ah bomb a thlak a, mi pali vel thiin mi dang 40-in hliam an tuar.
Ukrainian President Volodymyr Zelensky-a chuan thite hi an khawpui, Kyiv-ah a nih thu leh hmeichhe naupang kum 12 a tel thu a sawi.
Russia hian drone leh missile 600 chuang hmangin Ukraine-a region sarih vel an kap niin an air force chuan a sawi a. Zelensky-a chuan beihna ‘rawng tak’ avang hian Zaporizhzhia region-ah naupang pathum telin mi 16 vel an inhliam thu as awi.
Ukraine-in a chhan let ngei tur thu a sawi rualin Moscow chu ‘indo leh mi thah chhunzawm zel duh’ an nihna a lantir tih a sawi.
Russia-in kum thum chhung a thenawm a rûn tawhah Inrinni zana van sang atanga a beih hi tun hnaia tum khata a beihna nasa ber pawl a tling.
Zelensky-a chuan an kahna tam ber chuan Kyiv an tum tih sawiin Institute of Cardiology pawh a chhia tih a sawi.
Chhang siamna, lirthei rubber siamna leh apartment building leh vantlang thil tam tak bitum a ni bawk tih a sawi.
Zelensky-a hian Zaporizhzhia, Khmelnytskyi, Sumy, Mykolaiv, Chernihiv leh Odesa region-te pawh beih a ni tih a sawi a. Sumy region governor chuan mipa kum 59 mi a thi tih a sawi.
Zaporizhzhia Governor Ivan Fedorov-a chuan hliam tuar zinga naupang pathum, kum 11 leh 12 mipa leh hmeichhe naupang kum kaw mi a tel tih a sawi.
Zelensky-a chuan Ukraine-in ‘a bei let dawn’ tih a sawi a, Europe leh US atang pawhin ‘chhanna na tak’ a hriat a beisei tih a sawi.
“Beihna rawng tak hi UN General Assembly tawp chawlhkara thleng a ni a, Russia rilru puthmang leh an dinna chiang takin a tilang,” a ti.
Zelensky-a hian US President Donald Trump-a’n na zawka Russia hreka a vau tha a tih thu leh Europe-a an thawhpui ramte pawh Russian tuialhthei leh boruakalhthei an chawk luh titawp turin a ngen bawk.
Trump-a hian tun hnaia indo meka a tanna thlakin kar hmasa khan Russia-in indo avanga eibara harsatna a tawh mek laiin Ukraine hian Moscow-in a laksak ramte an neih kir ngei a ngaih thu a sawi a ni.
US president hian Russia hi na zawka hrekah a vau bawk a, hetih lai hian Kremlin lam chuan muanna a awm theihna atana inbiakna lam hawi rilru a la put phah rih lo hle.
Zelensky-a hian Russia hi anb ramah chauh tawp lovin Europe ram dangah pawh huang a zauh dawn niin a sawi a. Tun hnaiah Poland, Estonia leh Denmark ram chung zawnah an chetna ni ngeia ngaih theih turin thil thlawk hmuh a ni.
Hetih lau hian UN General Assembly-a Inrinnia thu a sawiah Russian Foreign Minister Sergei Lavrov-a chuan an ramin EU emaw, Nato member ram emaw beih tumna a neih loh thu a sawi a, an ram nektu erawh Moscow-in a chhan let tur thu a sawi.