Aston Villa an chak
October 3, Ningani zan khan UEFA Europa League 2025-26 League phase khelh chhunzawm a ni a, EPL club Aston Villa in hnehna an chang zawng. Villa an chak zawn lai hian Nottingham Forrest in chak ni hmel an la hmu ve thei lo thung. An match hmasa bera chak zo lo Forrest hi an mikhual FC Midtjylland hneh lovin an tlawm.
Mimualah Villa an chak
EPL ah an chet that vak oh tum pawha Europea a chetha tlat thin Aston Villa hi Dutch club lian Feyenoord Rotterdam hmachhawn turin Stadion Feijenoord-ah an leng lut. Mikhual an nihna hmunah an khel tha a, si hnih faiin hnehna an chang.
Stadion Feijenoord-a inkhel hmuhnawm takah goal a lut har hle. Goal thun tumin team hnihte an innawr tawn nasa viau a, dar kar khat chuang zet an khelh hnuah goal lut a awm tan chauh. Mimualah chak ngei tuma inlan Villa tan Emiliano Buendía chuan minute 61-naah hmahruaina goal a thun. Goal thun hmasa zawk an nih vangin Villa an phur a, goal thun belh tumin mualneitu an nawr zui nasa hle.
Dutch club Feyenoord in an si phurh sut ngei tumin tan an khawh a, inkhel hmuhnawm zawk an lantir. An si phurh sut tum viau mah se goal an chhuaj belh leh ta tlat zawk. Villa tan hian John McGinn chuan minute 79-naahan goal hnihna a thun a, an hmahruaina a tizau. McGinn goal thun hnuin goal dang a luh belh thei tawh lova, Aston Villa chuan mikhual an nihna hmunah si hnih faiin hnehna an chang a, point thum an hmu zui ta a ni.
EPL-ah 16-naa awm mek Aston Villa hi Europa League 2025-26-ah vawi hnih khel tawhin an chak zawn a, team 36 zingah chak zawn thei pasasrih zingah an tel a, pathumna an luah mek. Villa in pathumna an luah lai hian Feyenoord Rotterdam erawh chu vawi hnih an tlawm zawn ve thung a, point an la hmu lova, 35-naah an awm mek thung.
Forrest an tlawm
Ningani zanah Aston Villa in hnehna an chan laiin EPL club dang Nottingham Forrest erawh chu an mualah an tlawm ve thung a. Forrest hian an mikhual FC Midtjylland chu 3-2 in an hneh lo.
Nottingham Forest hmachhawn tura City Ground a lenglut Denmark club lian FC Midtjylland hian mikhual an nihna hmunah an khel tha viau a, chawlhlawk hmain goal hnih an thun hman. Danish club tan hian Ousmane Diao chuan minute 18-naah hmahruaina goal a thun. English club lakah goal an thun hmasa hian inrintawkna sang zawk a pe a, phurna sang zawk nen an inlan zui ta chiah bawk.
Goal chhuah hmasa zawkah tan bawk ah se Nottingham Forrest in an mikhualte phur lutuk tur an khap dai thuai a, an si phurh an sut thuai. Forrest tan hian Dan Ndoye chuan minute 22-naah goal thunin an si phurh a sut. Inhnaihchilh taka goal a luh zawn vangin inkhel a hmuhnawm leh zual a, goal dang pawh a luh belh leh thuai bawk.
Goal an chhuah hnuin Denmark club in goal thun tumin tan an khawh zui leh nghal chat a, an hlawhtling leh thuai. Bech Sørensen chuan goal an chhuah atanga minute hnih hnu; minute 24-naah hma an hruai let lehna goal a thun leh nghal zat. Minute ruk chhung lekin goal thum lut hman mah se inkhel hmuhnawm takah goal a luh belh mai thei tawh lova, FC Midtjylland in 2-1 a hmahruai chungin chawlhlawk an hmang.
Chwlhlawk hnu lamah FC Midtjylland an khel tha chhunzawm a, goal thu hmasa zawkah an tang nawn leh. FC Midtjylland tan hian Valdemar Byskov chuan hun tawp dawn hnaih minute 88-naah an goal thumna thunin an hmahruaina a tizau. Mikhual an nihna hmunah 3-1 a hma an hruai vangin FC Midtjylland hi chak turin an dinhmun a tha viau tawh a, point thum hmu ngei tura ngaih an ni tawh.
Dinhmun chhe takah ding tawh mah se Nottingham Forest an beidawng duh lova, an si phurh sut ngei tumin tan an khawh. Forrest hian hun pangngaiah goal thun belh thei tawh lo mah se hun pek belhah goal thun theihna hun tha an hmu a, penalty an hlawhchhuak. Penalty hi Chris Wood chuan minute 90’+3-ah a pet goal a, an si phurh a sut then. Wood goal hian fuih phur thar viau mah se hun tawp thlengin goal an thun belh thei tawh lova. Nottingham Forrest chu an mualah hreh tak chungin an tlawm ta nge nge a ni.
Nottingham Forrest lakah an chak leh tak vangin FC Midtjylland hian khelh hnih atangin point ruk an hmu a, table-ah pahnihna an luah. hetihlai hian Nottingham Forerst erawh chuan point khat chauh an la hmu thung a, 25-naa an luah mek ve thung.