Chawlh tumna la nei lo Djokovic!

Chawlh tumna la nei lo Djokovic!
A elpui lian pahnih Roger Federer leh Rafael Nadal baka Andy Murray-te’n racquet an tun tawh hnuah kum 38 mi lai ni ve tawh chungin Novak Djokovic chuan tennis inelna chawlhsan turin ruahmanna a la siam lo tih tunhnai khan khawvel hriatah a sawi chhuak!
Grand Slam singles title 24 la tling thei awmchhun pahnih zinga pakhat zawk Serb-in hnah thar thahrui fei zawk an lo chhuah tawh hnu thlenga chawlh lam a la hawi loh chhan hi hmabak pakhat hlenchhuah tur a la neih vang niin a ngaih loh theih loh a, chu chu khum mai mai harsa tawh tur record malkhalh chunga chawlh ngei a duh vang niin a lang!
Tarlan tawh thin angin, Djokovic leh Australian legend Margaret Court-te chu tennis chanchina Grand Slam singles title la hnem ber an ni dun mek a, he record intawm atanga pen khata hmasawn turin Djokovic hian theihtawp chhuah kumtin mah se kum 2023 hnu lamah major title a sualchhuak thei ta tlat lo a, vawi khat chauh champion leha Grand Slam singles title la hnem ber ni thei a nih avangin la ‘try’ leh hram hram hi tihawm tak ni rengin a lang!
Amah chuan kum 40 kai tawh chunga khelmuala la ropui thei infiammi ropui NBA great LeBron James, veteran footballer Cristiano Ronaldo leh National Football League (NFL) quarterback hlui Tom Brady-te daih reinain la chawl bik lo turin chakna a pe niin a sawi thung!
Novak chuan, “Khawvel huap sports hi thlir ila, Los Angeles Lakers forward LeBron chu kum 40-ah pawh a la khawng em em a; Cristiano Ronaldo leh Tom Brady-te pawh kum 40 tlin hnuah an la inkhel thei a, a awihawm loh hial zawk a ni.
“He’ng mite hian min hneh takzet a, kei pawhin la inkhelh zel rih ka duh a, anni hi chute tura phurna leh thathona min petute an ni,” a ti.
Djokovic hian kumin Grand Slam paliah semi-final lut kim vek mah se a champion zo lo vek a, tun thlengin a major trophy 25-na tur a hlawhchhuak zo lo tlat a; kum 40 hnaih ve tawh mah se ATP ranking lamah pawh world number five lai a la nih phak avangin record ropui la nghah fan fan chu a tan pawh tih awm tak ni ve reng rengin a lang!
Djokovic ni Ningani khan Saudi Arabia ramah Italian Jannik Sinner hneh loin a tlawm leh rih a; sum vir vel hraw hraihna Six Kings Slam exhibition event vawiin final match-ah champion lai Sinner chuan world number one Carlos Alcaraz a hmachhawn dawn a ni.
Riyadh khawpuia ni thum chhung awh tur player tha zual paruk inelna kal mekah hian player tinah tournament-a an chhuah hrim hrim manah US dollar maktaduai 1.5 an hlawh hrim hrim phawt dawn a, champion phei chuan match tlemte khelhah US dollar maktaduai 4.5 tehreng an rut tling dawn!
Match tin hi live-in Netflix lamah phochhuah zel a ni a; nikum final-ah pawh Sinner leh Alcaraz bawk intumin, Italian zawk hi Six Kings Slam champion hmasaber a ni a, kumin hian Riyadh khawpuiah a title kawl lai humhim a tum dawn a ni.
Djokovic nena an intum hnuhnung vawi rukah Sinner hi a chak fai vek a, chu’ng zingah chuan tun season French Open leh Wimbledon semi-final a tel a; Ningani pawh khan Italian hian Serb lakah harsatna lian a tawk lo leh khawp mai a, 6-4 6-2 hnehna nen final a lut.
Semi-final pakhat zawkah World No 1 Alcaraz pawhin 6-4 6-2 bawkin Taylor Fritz a paltlang a, kheimit hliam avanga kumin Shanghai Masters atanga a inhnuhdawh hnua tournament a hmachhawn leh vawi khatna ni.
Tennis mipa big three chuai hnua rawn vul mek Sinner leh Alcaraz laka chak ni hmel hmuh harsat hle tawh Djokovic-a tan record siamna tur major trophy pakhat hlawhchhuah leh hi a huphurhawm hle tawh dawnin lang mah se, “Daihreina hi phurna min petu lian zinga pakhat a ni a, engtia rei nge ka kal theih dawn tih hi hriat ka chak a ni,” a ti.
Djokovic hian kumin hian Geneva khawpuiah a career-a a title 100-na a hlawhchhuak fel tawh a ni.