Water Leak Report Apps

PHE department chuan tunlaia Aizawl khawpuia tui harsatna a thlen chhan an sawifiah a, tui pipe leh mimal tui zem atanga tui leak ven nan theihtawp chhuahpui tura mipui ngenin, tui leak report-na Water Leak Report Apps chu hmang tangkai turin mipui an ngen nghal bawk a. Hei bakah hian mimal tui dahna atanga tui liam ven nan Ball Float Valve vuah turin mipui hnena ngenna tihchhuah an tum mek bawk a.
Tui harsat chhan lian tak pakhat chu, Vaivakawn Zohnuaia lei chein Phase-III Pipe line a tih chhiat vang niin, tun thleng hian siam zawh a la ni lova, department lamin theihtawp an chhuah reng tih pawh mipuiin kan hmuhpui a, tui harsatna a thleng hi tui pek lama mawhphurtu department hian pawi an tiin hreawm pawh an ti ang tih a rin theih. Chuvangin, tui harsatna thlengah hian a buaipuitu department tawng pawng dem ngawt lova, thil awmzia dik tak hriat tum ve hi mipui lam hian kan tihtur a ni ve pakhat awm e.
Ni e, tui pipe leak hi hmun tam takah a awm a, kawngpuia tui luang dum dum khawpa nasaa tui pipe leak te pawh a awm zut thin. PHE department lamin hei hi an vei a, mahse khawi kipah an awm vek seng lova, an hmu vek thei bik lo; hetah tak hian mipui nena kan tanrual a pawimawhna a lo lang ta a ni. Department lamin Water Leak Report Apps an siam hnuah report 310 an dawng tawh a, a rang thei ang bera siam that zel a ni. Hei hi a hlawkthlak hle. Tui pipe leak leh mimal tuizem liam zur zur thin hian tui indaihlohna a thlen theih chu thuhran ni se, hetianga tui pipe leh tuizem a leak a, a liam reng hian, lei hnuai lam a chiah hnip zel a, a lo rei deuh hnuah lei a tawlh phah loh leh a tlahniam a, kawngpui a chhiat phahin chenna in thlengin a chim phah thin tih pawh mit ngeiin kan hmu thin a nih hi.
Mimal tuizem luang liam ven nana Ball Float Valve vuah chungchangah hian, mipui hnena ngenna siam hi a that rualin, ngenna hi chu tihhlawhtlin ngei ngei tur tihna a nih kher loh avangin, tuna kan mamawh dan leh a pawimawh dan thlir hi chuan, ‘ngei ngei’ (mandatory) zawnga kalpui hi kan tihtur leh, kan duinhmun pawhin a phut a ni ber tawh awm e. Ball Float Valve hi, daihzai zawka tui sem rual theihna leh mihring khawsakna kawnga himna thlentu a nih nghal avang hian, vuah vek hi kan mamawh em em zawk a ni.