Liverpool an chak ve ta e!

Nilaini zan khan UEFA Champions League 2025-26 – League round khelh chhunzawm a ni a, tunhnaia chak harsat Liverpool in hnehna an chang ve ta nge nge a, 5-1 ngawtin Eintracht Frankfurt an hneh. Liverpol an chak rual hian EPL club lian Chelsa in hnehna an chang a, Tottenham an chak zo lo thung.
Reds an insiamtha
An khelh hnuhnung pali a tlawm zawn tawh Liverpool hi German club Eintracht Frankfurt hma chhawn turin Deutsche Bank Park-ah an lenglut. Mikhual an nihna hmunah bul an tan tha lova, goal chhuah hmasa zawkah an tang. Goal chhuah hmasain an dinhmun derthawng hman mah se goal nga ngawt thunin an khingpuite an lehthal a, insiamthain hnehna an chang ve leh ta nge nge.
Eintracht Frankfurt hian an mualah bul an tan tha a, Rasmus Kristensen chuan minute 26-naah hmahruaina goal a thun. Goal thun hmasa zawkah an tan vangin phur viau mah se an goal thun hian Liverpool a chhaihkawlh a ni ta ber a, an mikhual er let tuar lovin goal nga ngawt an chhuah.
An hmelma lian ber Manchester United an hneh loh vanga hnual leh boruak hniam tak Liverpool hian chak an mamawhzia an hrechiang a, goal thun ngei tumin an khingpuite an nawr let na hle. Nipui bazar inhawn laia an lak luh fuh tak Hugo Ekitike chuan minute 35-naah goal thunin an si phurh a sut. Ekitike goal thun hian Reds a fuih phur viau a, chawlhlawk hmain goal hnih ngawt an thun belh leh hman.
Arne Slot-a enkawl Liverpool tan hian defender duhawm Virgil van Dijk chuan minute 39-naah hma an hruai letna goal a thun. Hma an hruai let hnuin Reds an khel tha leh zual a, defender Ibrahima Konaté chuan minute 44-naah an goal thumna a thun belh zui leh a, 3-1 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal hnih an thun belh leh. Club leh ram tana khel tha thei tak Cody Gakpo chuan minute 66-naah goal thunin an hmahruaina tizau te te a, Dominik Szoboszlai chuan minute 70-naah an goal ngana thunin a tawp a khar. Chak mamawh Liverpool chuan an mamawh ang ngeiin hnehna an chang a, Mimualah point thum an hmu zui ta a ni.
Eintracht Frankfurt laka chak Liverpool hian khelh thum atangin poinr ruk an hmu a, 10-na an luah mek. Hetihlai hian German club Eintracht Frankfurt hian khelh thum atangin point thum chauh an la hmu a, 22-na an luah ve mek thung.
Chelsea pawh an chak
Nilaini zana inkhel dangah London club lian Chelsea chuan an mikhual Ajax Amsterdam chu 5-1 in an hneh a, an mualah awlsam takin point thum an hmu ve bawk..
Chelsea hian Stamford Bridge-a an mikhual Ajax lakah bul an tan tha lutuk lo naa tam zawk an ni thuai thung. Inkhel tan atanga minute 17-na lekah ajax player hnawhchhuah a ni. Team lian zawk leh chak tura rinkai zawk Chelsea lakah tlem zawk an nih vangin Ajax dinhmun a chhe viau a, an len luhna mualah an tan chet a har tawh hle. Ajax hi kim lo zawk an nih bakah penalty vawi hnih ngawt an chawi bawk a, London-ah mangchhia an mang a ni ber mai.
Ajax an hnual laiin Chelsea an phur ve thung a, goal pawh an thun thuai. Tam zawk an nih atanga minute khat pawh tling loah Marc Guiu chuan hmahruaina goal a thun. Guiu goal thun atanga rei lo minute 27-na lekah season kal meka khel tha tak Moisés Caicedo chuan Chelsea goal hnihna a thun zui leh nghal. Ajax tan hian Wout Weghorst chuan minute 33-naah penalty atangin an si phurh sut then bawk mah se penalty an chawi zawn tlat thung.
Goal an chhuah hnu lawkah Chelsea hian penalty an hlawhchhuak a, Enzo Fernández chuan minute 45-naah penalty atangin an goal thumna a thun a. Estêvão chuan minute 45’+6-ah penalty atangin an goal lina a thun zui leh zat bawk a, 4-1 ngawta hmahruai chungin chawlhlawk an hmang.
Chawlhlawk hnu lamah Chelsea an khel tha chhunzawm a, minute 48-na lekah Tyrique George chuan an goal ngana a thun. George goal thun hnu hian goal dang a luh belh thei tawh lova, Chelsea chuan an mualah 5-1 in hnehna an chang zui ta a ni.
EPL club Liverpool leh Chelsea ten hnena an chan lai hian Tottenham chu Monaco nen goal awm lovin an inhnehtawk ve thung.