Messi contract thar a hmin leh tawh!

Messi contract thar a hmin leh tawh!
Inter Miami tana kum 2028 thleng khelh chhunzawm turin Lionel Messi chuan contract thar a ziak a, tun dinhmuna a hawiher enin kum 38 mi nungchang leh thutlukna siam danah football chawlhsan lam reng reng a la lang lo a, ram tan pawh nakkum world cup hi a la khelh ngei rinna a lian chho tulh tulh!
Major League Soccer club nena inremna thar an ziah leh tak thu hi Ningani khan MLS team Inter Miami chuan nemnghetin, Argentine great an kawl chhuzawm leh thei tur hi North American league tan pawh a lawmawmin, a phurawm hle tura ngaih a nih rualin Messi career la tawp mai lo tur pawh hi khawverl puma football fans tam zawk tan pawh chanchin duhawm a tling awm e!
Messi an kawl hlim boruak atang khan Forbes chhut danin Miami club hlutna hi a let thawkin a pung chho a, kum 2022 atanga a hlutna chu US dollar vaibelchhe 1.2 laiah kai chho tawhin, kumin kumtir khan MLSD team zinga hlu ber dawttuah Forbes hian a puang zui leh ta nghe nghe a ni.
MLS Commissioner Don Garber chuan thuchhuah a siamah, “Lionel Messi ngei maiin MLS hi a League of Choice atana a thlan hnu khan he league hi a kang nghal dawrh a ni ber a – Inter Miami tan chauh pawh a ni lo, North America khawmual pumpui soccer tan hian hmasawnna lianpui a rawn thlen nghal dawrh a ni.
“Thil chiang nghal chu – footballer piang chhuak tawh zawng zawng zinga ropui ber kan kawl miau avangin khawvel chuan kan league hi a ngaihven lo thei lo,” tiin a tuihnih.
|um riat ngawt Ballon d’Or chawimawina dawng tawh Messi hian a hma deuh pawh khan Inter Miami chu a club hnuhnungber a nih mai theih thu a lo sawichhuak tawh a, mahse, tuntuma contract thar a ziah boruakah hian chawlh lam reng reng a ka atangin a la richhuak lo a, kum erawh chawlh leh chawlh loh hriltu ber a nih loh thu a lo sawi tawh bawk a ni!
Kum 40 hnaih ve tawh chunga Argentina captain la ni thei Messi nena contract thar an ziah leh hnuah Inter Miami co-owner David Beckham chuan an tum ber leh an vision chu Inter Miami Inter Miami co-owner David Beckham tana khel tura khawvel player tha ber ber sengluh a nih thu leh chu chu tun dinhmuna an tih mek a nih thu tarlang chungin Lionel Messi chungchang a sawichhuak a, “A hnaah a la inpumpek thei a, hnehna chan zel duhna rilru a la pu nghet tlat a ni,” a ti.
2022 World Cup winner Messi hian tun season kal mekah a club vawn lai tan league goal 29 zet thun tling leh der tawhin, Inter Miami chu Eastern Conference-ah pathumna a nihpui a, nizan result tarlan hman loh MLS Cup playoffs khelh tan tak first round match-ah Nashville SC an hmachhawn nghe nghe.
Tunkar Ningani khan Miami striker hi league MVP award dawng thei tura chhawpchhuah player panga zingah a tel leh bawk a ni.
Messi hian kum 2023 khan North American league-ah hian a vawi khatna atan contract ziakin, a elpui kumhlun Cristiano Ronaldo hnungzuia sum tam uchuakna Arab league a zawm ve ta mai lo khan mak tih pawh a hlawh viau a, mahse, Inter Miami lamah chuan a nghet ta phian a nih hi.
Nakkum hi Canada, Mexico leh a khawsak mekna United States-in World Cup an inthlentawm hun tur kha a ni tawh a, Argentina mipui tan pawh an title kawl lai humhum an tumna kawnga an captain la chhawr leh theih beiseina a lian hle ang le!