BIHAR INTHLAN: BJP-in inlan duh lova an puh Gandhi-a pawh a campaign dawn

BIHAR INTHLAN: BJP-in inlan duh lova an puh Gandhi-a pawh a campaign dawn
Bihar assembly inthlan hun hnai mek zelah Congress chuan thuang thuma campaign beihpui thlak tur an ruahman a. BJP-in an hruaitu lawkte an inlan duh lo nia an sawi mek karah Rahul Gandhi pawh a inlanna tur ruahman a ni a, eptu tangrual hian Tejashwi Yadav-a nen vantlang inkhawm hmun khata hun an hmanna tur an buatsaih.
Congress chief Mallikarjun Kharge leh an hruaitu dang, Priyanka Gandhi Vadra pawh Thawhtannia Bihar-a an sakhaw kût lian ber, Chhath puja zawhah an campaign dawn nia sawi a ni a. An manifesto pawh Thawhlehnia tlangzarh an tum.
Eptu tangrual, Mahagathbandhan hian hun rei tak thutlukna siam thei lo leh dinna bial inchan sem dana inrem lohna neuh neuh an neih hnuah Rashtriya Janata Dal hruaitu, Yadav-a chu chief minister atan an vawrh chhuak ta a, Vikassheel Insaan Party (VIP) chief Mukesh Sahani chu a thachhangdawltu atan an zuar dawn bawk.
Chief minister leh a deputy tur zawrh tur hi Ningani khan Patna-ah Congress hruaitu hlun, Ashok Gehlot-a’n a puang a. Rorel lai, BJP kaihhruai NDA chu na taka bei nghalin Nitish Kumar-a chu chanvo sang ber chelh turin an la chhawp chhuak ngam ve lo niin a sawi.
“Amit Shah hi ka zawt duh a… keini chu kan hruaitu chu Tejashwi Yadav-a a ni a. Nangni pawhin tu nge chief minister atana invawrh chhuah tur inpho chhuah ve a hun ta,” a ti.
“Nitish Kumar-a hian dik lo taka tihna a hmachhawn mek a. NDA-in chief minister atana zawrh tur pawhin an la ti lo va. Amit Shah hi kan zawt duh a, Nitish Kumar-a hi inthlan hmain chief minister atan invawrh chhuak dawn em, tun hi a hun a ni lo em ni? Tun hi Nitish Kumar-a tan inthlan hnuhnung ber a ni a, Amit Shah hian chiang takin a tilang tawh,” tiin Yadav-a pawhin a sawi.
Mahagathbandhan hian state inthlan pawimawh takah hian buaina neuh neuh an nei hman a. Hemant Soren-a chuan Bihar-a din ve an tumna hnukdawkin an state, Jharkhand-a Yadav-a party leh Congress party nena an thawhhona pawh ennawn a nih tur thu a sawi a. Ningania chief minister atana zawrh tur an puannaah erawh inlungrual takin an awm leh tawh a ni.
Bihar-a bial 243 awm hi November 6 leh November 11-ah an inthlang dawn a. November 14-ah vote tlate chhiar a ni ang.