YMA president tharin kawng ngaih pawimawh tum
Ningani khan YMA an inthlang a, tum dang ang bawkin YMA inthlan hian ngaihven a hlawh. Central YMA hruaitu atan mi paruk an thlang thar a, an president tharin kawng ngaih pawimawh a tum thu a sawi.
“Mizoramin kawng chhia vangin harsatna kan tawk a, kan kawngte a that theih nan a theih ang anga hmalak a ni ang. Heti lam hi ngaih pawimawh kan tum,” Central YMA president atana thlan thar R Lalngheta chuan a ti.
“National Highway chhia kan tuar a, hmun dangah pawh kawng a chhia a, a theih ang angin kawng tha kan neih theih nan hmalak a ni ang,” a ti bawk.
YMA leh PWD-in kawng tha kan neih theih nan MoU an ziah thin thu, kum khat danah an ziah thar zel thu leh thla hmasa lawkah pawh ziah thar a nih thu a sawi a, chuvangin YMA-in kawng a ngai pawimawh a, kawng a that theih nana theihtawp chhuah chu YMA tih tur a nih thu a sawi.
“A siamtu contractor emaw sorkar emaw, a tul angin kan dawr ang a, heti lamah hian theihtawp chhuah a ngai. National Highway a ni emaw kawng dang a ni emaw, YMA-in theihtawp a chhuah dawn a ni,” a ti.
General Conference-ah kumpuan atan ruihhlo do an thlan thu a sawi a, ruihhlo dona lamah YMA-in theihtawp a chhuah zel tur thu sawiin, a zuarte lam hawi zawnga kal pawh tula a hriat thu a sawi.
“Kan hriat theuh angin ruihhlovin min tibuai a, ruihhlo laka thalaite chhanchhuah an ngai. Hei hi ngaih pawimawh a ni ang a, a ti thinte’n an sim theih nan mai bakah a zuarte’n an sim theih nan theihtawp chhuah a ni ang,” tiin ruihhlo do chungchang hi a sawi.
Ram leh hnam tana theihtawp a chhuah tur thu a sawi a, YMA-in ram leh hnam thatna tur theihtawp a chhuah tur thu sawiin, “Kan hnam issue thil hrang hrang ngaih pawimawh a ni ang a, hnam thil hi ngaih pawimawh a ni ang,” a ti.
Zofate inpumkhatna lam a ngaih pawimawh thu a sawi bawk a, “Hnam inpumkhatna lamah theihtawp chhuah ka duh a, heti lam hi ngaih pawimawh a ngai,” a ti.
YMA chu mimal thua kal ni lovin pawl rorelna a nih thu a sawi a, pawlin hmalak dan tur a rel ang a, pawl dang, YMA thawhpuite nena tangrualin ram leh hnam thatna tura theihtawp chhuah a nih tur a sawi.