MP leh MLA raltlan 20 vel awm mek

Mizoramah Myanmar ram atangin mi a sing tel an raltlan a, an zingah hian MP leh MLA te pawh an awm. Tunah hian MP leh MLA hi 20 vel Mizoramah an awm mek nia hriat a ni.
2021 February ni 1-ah Myanmar-ah sipaiin sorkarna an pawnglak a, an buai zui avangin ram hrang hrangah mipui an tlanchhe nghal. Mizoramah pawh 2021 atang hian mi engemaw zat an raltlan a, kuminah pawh lut thar an la awm.
2021-ah hian MP leh MLA-te pawh hmun hrang hrangah an tlanchhia a, Mizoramah pawh an lut nual. A tir lamah chuan 20 an chuang a, mahse Mizoram atanga hmun danga kal an awm.
Thu dawn danin, tunah hian MP leh MLA raltlan hi Mizoramah mi 20 vel an awm a, Aizawlah leh Lawngtlaiah an awm. Aizawlah panga chu in luahin an awm a, Lawngtlaiah in luah an awm bawk. Mi dang chu man chawia awm theihna hmun dangah an awm.
MP leh MLA Mizorama lutah hian pathum chu hun engemaw chen an awm hnuah ram dangah an insawn tawh.
Mizorama awm mekah hian pakhat chu kawl a ni a, mi dang hi chu an vaiin Zo hnahthlak an ni. Mizorama chhung leh khat leh thenrual nei vek an ni a, mahni khua ang maia tlangnel sa an ni.
MP leh MLA raltlante hian ei leh in tur pawh an dap chawp a, dawr siam te pawh an awm. Dawr siam lova in lama eitur siama zuar chhuak te pawh an awm.
Myanmar MP leh MLA raltlante hian mahni awmna theuh atangin online hmangin rorel inkhawm an nei thin a, MP-te chuan kum khatah rorel inkhawm hi vawi ruk an nei thin. Kuminah pawh vawi li an nei tawh. MLA-te hian mahse state/division theuhvin rorel inkhawm an nei thin bawk.
“MP leh MLA kan la ni reng a, mipui thlan sorkar hi ding reng se kan duh avangin keiniho hi mipui thlan kan ni tiin rorel inkhawm hi neih zel tul kan ti a ni,” Mizorama MP raltlan pakhat chuan a ti.