African player tha ber Hakimi

November 19, Nilai zan khan Rabat khawpuiah African Footballer of the Year at the Confederation of African Football (Caf) chawimawina sem a ni a. Morocco right-back Achraf Hakimi chuan mipa lama chawimawina sang a dawn a. Morocco captain Ghizlane Chebbak chuan hmeichhe lama chawimawina sang a dwng ve bawk.
Defender tha zet mai Achraf Hakimi hian he chawimawina sang dawng tur hian a elpui lian Mohamed Salah leh Viktor Osimhen te a khum. Kum 2023 leh 2024 khan chawimawina sang dawng thei tura chhawpchhuah ni bawk mah se a chung ber a luah zo lova, kum 2025-ah a hun a inherchhuak ve ta nge nge a. A vawi khat nan mimal chawimawina sang a dawng a. Morocco player zingah Mustapha Hadji (1998) hnu lama he chawimawina dawng leh hmasa ber a ni nghal bawk.
Hakimi hi season liam ta khan club leh ram tan a chetha hle. PSG chu champions League-ah a vawi khat nan a champion pui a. Inter Milan lakah final-a goal hmasa ber hi a thun a ni nghe nghe. PSG hi French Ligue-a an champion bakah UEFA Super Cup-ah an champion bawk a. Fifa club World Cup final-ah erawh Chelsea hneh lovin an vanduai thung. PSG tan Hakimi hian a thawhhlawk em em a, an player tangkai, indaih zai, a tulna hmun apianga lo awm hman thin a ni.
PSG tan a chetthat ang bawkin Morocco tan pawh a chetha viau. Morocco hi World Cup 2026 khel turin a tlin pui a, CAF atanga tling hmasa an ni nge nghe. Morocco hian African Cup of Nations an khel zui dawn a. An tualzawlah ngei champion tumin tan an khawh dawn a. Tun dinhmunah chuan champion tura rinkai ber zinga mi an ni. 1976 hnu lamah a vawi khat nan inelna liana an champion thei a nih chuan a hlu dangdai khawp ang.
Hmeichhe lama chawimawina sang dawngtu Ghizlane Chebbak hi Morocco captain a ni a. 2024 Women’s Africa Cup of Nations-ah top-scorer a nih bakah Best player a ni tel bawk. Morocco hmeichhe zingah he chawimawina dawng hmasa ber a ni.