Messi magic hmangin Miami kutah MLS Cup title
Messi magic hmangin
Miami kutah MLS Cup title
Chase Stadium-a 2025 MLS Cup final-ah Inter Miami chuan Vancouver Whitecaps laka 3-1 hnehna changin a vawi khatna atan MLS Cup lallukhum an hlawhchhuak a, goal khung ve lo captain Lionel Messi bawk a langsar leh!
Inrinni inkhelah Thomas Mueller hoin Vancouver lam khan inkhel thunun zawk mah se minute riatna lekah Messi chuan Tadeo Allende tan hun remchang siamsakin, lei hrul deuh thawa Allende cross ball vawrh chhuah chu an lam goal-ah Vancouver defender Edier Ocampo chuan a tilut palh a, Miami lamin hma an hruai phawt.
Vancouver lam hian break zawhah ball an thunun nghet zawk a, minute 60 an khelh tlin dawnin an siphurh pawh an sut zui ta mai reng a, 1-1 a nihna goal hi Ali Ahmed-a chhuihluh niin, hniam set sawta a shot phei chu Inter Miami keeper Rios Novo chuan khawih fuh mah se a dang zo lo.
Miami hian second half minute 71-ah an hmahruaina neikirin, Messi chuan Vancouver ball chhuhsakin midfielder Rodrigo De Paul goal tur a siamsak a, Paul-a ball hi Vancouver Japanese goalkeeper Yohei Takaoka tan dan ngaihna a awm lo!
Inter Miamia goal thumnaah pawh thuk takin Argentine a inrawlh leh a, hun pek belh zawh dawnah Allende goal tur chhawpsak lehin, a vawi khatna atan Messi chuan America leilungah MLS league title a hlawhchhuak ve ta nge nge a, Barcelona lama a khelhpui thin Jordi Alba leh Sergio Busquets-te nen lawm avangin an biangah mittui a tlaho leh ta nge nge e!
Inkhelh banah MVP atana thlan Messi chuan kha hnehna kha an tum bulpui zinga pakhat a nih thu sawi chungin, “Nikum khan league-ah pakhatna ni mah ila vanduaithlaktakin, first round kan pel zo lo.
“MLS hi chu lawmman u ber a ni a, he hnehna sualchhuak tur hian team chuan kan theihna zawng zawng kan sawrchhuak a ni,” a ti.
Kum 38 mi hian a Barca team-mate hlui pahnih chawl tawh tur Alba leh Busquets-te chungchang tarlang telin, “Anni hi ka lawmpui a, heti ang hnehna nen ngei maia career khar theih chu a nuam dawn em mai. An pahnih hian ka hmangaih thian tha ve ve niin, an nun pumpuia football tan leh an khelhna team tana inhlan ral thak thin ve ve niin, he title nena an chhuak tur hi ka lawmpui a, duhsakna sang ber ka hlan e,” tiin Miami atanga inpuchhuak tur a thiante pahnih thlahna thuchah a sawi nghal.
Club neitu pakhat David Beckham pawh an team-te hnehna an chan rual khan lawm avangin a zuang tawr tawr a, hamrik hnuhnung ber rik rualin khelmualah a tlanlut a, an champion-na goal thuma inrawlh kim vek Messi a fak chul bawk.